ცნობილი მახარებელი ფრანკლინ გრემი, „ბილი გრემის ევანგელისტური ასოციაციისა“ და „სამარიტელის ქისის“ პრეზიდენტი, ეკლესიებს სთხოვს, ილოცონ ამერიკელი ერისათვის ამ შავბნელი დღეების განმავლობაში.
შავკანიანი ჯორჯ ფლოიდის სიკვდილს პროტესტის ძლიერი ტალღა მოჰყვა ქვეყანაში, რასთან დაკავშირებითაც ფრანკლინ გრემმა სთხოვა ხუცესებს, რომ კვირა დღეს, ღვთისმსახურების დაწყებამდე ელოცათ მშვიდობისა და მოთმინებისათვის, ასევე იმისათვის, რომ ღმერთმა სიბრძნე მიანიჭოს ქვეყნის ლიდერებს კრიზისიდან გამოსასვლელად.
გრემმა თავისი „ფეისბუკის“ გვერდზე დაწერა:
„ქრისტიანების ყველაზე ძლიერი იარაღი და ყველაზე ძლიერი თავდაცვა ლოცვაა. ჩვენს ქვეყანას ახლა განსაკუთრებით სჭირდება ლოცვა. ჩვენ უნდა ვილოცოთ მშვიდობისათვის, რადგან ‘ადამიანის რისხვა არ ქმნის ღვთის სიმართლეს.’ (იაკობი 1:20).
ილოცეთ მოთმინებისათვის, რათა ‘ღვთის სახიერება, თავშეკავება და სულგრძელობა’ იყოს ყოველი ჩვენგანის მიმართ (რომაელთა 2:4).
ილოცეთ, რომ ღმერთმა სიბრძნე მისცეს ჩვენს ლიდერებს, რომლებიც ცდილობენ, გაუმკლავდნენ ამ კრიზისს. სთხოვეთ ღმერთს, რომ შეცვალოს ადამიანთა გულები და ისევ გაამთლიანოს გაყოფილი ერი.“