საერთაშორისო საქველმოქმედო ორგანიზაციამ „სამარიტელის ქისა“ უკრაინაში ომის დაწყებიდანვე მალევე გაგზავნა დამხმარე ჯგუფები და ისინი პოლონეთისა და რუმინეთის საზღვრებთან განათავსა, რათა ლტოლვილებს დახმარებოდნენ. სიტუაციის გაუარესებასთან ერთად ორგანიზაციამ საველე ჰოსპიტლები გახსნა უკრაინის ტერიტორიაზე.
27 მარტს „სამარიტელის ქისის“ პრეზიდენტმა და ცნობილმა ევანგელისტმა მქადაგებელმა ფრანკლინ გრემმა საკუთარი „ფეისბუკის“ გვერდზე ფოტომასალა გამოაქვეყნა და თქვა, რომ უკრაინაში ჩავიდა თავისი გუნდის მოსანახულებლად.
„ახლახან ჩამოვედი უკრაინაში, რათა შევხვდე ჩვენს პერსონალს, რომლებიც ხალხის დასახმარებლად აქ კონფლიქტის დაწყების შემდეგ მუშაობენ. „სამარიტელის ქისას“, დაახლოებით, 160 ადამიანი ჰყავს უკრაინაში: ექიმები, ექთნები, ლაბორანტები და ტექნიკური პერსონალი, რომლებიც არიან ჩვენს საველე ჰოსპიტალში ლვოვში, ასევე რამდენიმე ამბულატორიული სამედიცინო კლინიკის ადგილას. აქ კაპელანებიც გვყავს Billy Graham Evangelistic Association-დან. 3.7 მილიონზე მეტი უკრაინელი ომმა ლტოლვილად აქცია და უამრავი მილიონი ადამიანი საკუთრი ქვეყნის შიგნით გახდა დევნილი, რაც ჩვენი დროის ერთ-ერთი ყველაზე დიდი ჰუმანიტარული კრიზისია. ილოცეთ მათთვის, ვინც იტანჯება…“ – წერს გრემი საკუთარი „ფეისბუკის“ გვერდზე.
შეგახსენებთ, რომ „სამარიტელის ქისა“ ქრისტიანული ორგანიზაციაა, რომელიც დაარსდა აშშ-ში, ჩრდილოეთ კაროლინაში 1970 წელს ბაპტისტი ხუცესის, რობერტ პირსის მიერ. 1979 წლიდან, პირსის გარდაცვალების შემდეგ, ორგანიზაციას ფრანკლინ გრემი ხელმძღვანელობს. „სამარიტელის ქისა“ ჰუმანიტარული ორგანიზაციაა, რომელიც ეხმარება ადამიანებს მსოფლიოს სხვადასხვა წერტილში გადაუდებელი პირველადი დახმარებით ომების, ეპიდემიების თუ ბუნებრივი კატასტროფების დროს. იგი ასევე ცნობილია პროექტით „საშობაო ბავშვი“, რომელიც ყოველ წელს მილიონობით სასაჩუქრე ყუთს აგზავნის მსოფლიოს სხვადასხვა წერტილში ბავშვებისთვის.