„იესო მკურნალია“ – ამ ფრაზის გამო ინდოელ ექიმს გასამართლება ელის

ინდოეთის ცენტრალურ შტატ მადჰი პრადეშში ახალგაზრდა, ქრისტიან ექიმს, სანდია ტივარის ლიცენზია შეუჩერეს. მას გასამართლება ემუქრება იმის გამო, რომ ოჯახებს, რომლებსაც ის Covid-19-ის წინააღმდეგ ბრძოლის და ინფორმირების პროგრამის ფარგლებში სტუმრობდა, ამხნევებდა, რომ „იესო ქრისტე მკურნალია“. ინფორმაციას ქრისტიანთა უფლებადამცველი ორგანიზაცია „International Christian Concern“-ი ავრცელებს.

პროგრამის ფარგლებში, 22 მაისს ექიმმა მოინახულა რატლამის რაიონი და დაარიგა ბროშურები, რომლებიც შეიცავდა Covid-19-თან ბრძოლის შესახებ რეკომენდაციებს. ექიმს ერთ-ერთმა ნაციონალისტმა სამოქალაქო აქტივისტმა ვიდეო გადაუღო, სადაც ის მის დაკითხვას აწარმოებს. ვიდეო სოციალურ ქსელში გავრცელდა, რის საფუძველზეც ექიმი პოლიციის განყოფილებაში გადაიყვანეს.

„რა არის ცუდი იმ ფრაზაში, რომ ღმერთი კურნავს? მე არავისთვის მითქვამს, რომ ქრისტიანობაზე მოქცეულიყო. მე ქრისტიანი ვარ და მათ ვუთხარი, რომ იესო მკურნალია. “ – ამბობს ვიდეოში სანდია.

აღსანიშნავია, რომ ინდოეთის ბევრ შტატში და მათ შორის მადჰი პრადეშში მოქმედებს „სხვა რელიგიაზე მოქცევის საწინააღმდეგო“ კანონი, რომელსაც ინდუისტი ნაციონალისტები ხშირად იყენებენ ქრისტიანთა წინააღმდეგ. ისინი ყალბ ბრალდებებს უყენებენ ქრისტიანებს და მათზე იერიში მიაქვთ სავარაუდო, იძულებითი მოქცევის საბაბით.

„ინდუისტ ნაციონალისტთა მოსაზრებაა, რომ ინდოელი უნდა იყოს ინდუისტი, ამიტომ ნებისმიერი სხვა რწმენა, მათ შორის ქრისტიანობა, განიხილება, როგორც არაინდური. შესაბამისად, ქრისტიანობაზე მოქცევის გამო, ხშირად უკიდურესად დევნიან ადამიანებს და მათი ოჯახის წევრებს.“ – წერს „Open Doors“-ი ინდოეთში ქრისტიანთა ყოფის შესახებ.

შეგახსენებთ, რომ ქრისტიანები ინდოეთის მოსახლეობის 2.3%-ს შეადგენენ. მართალია, ქვეყანაში რელიგიის თავისუფლება კონსტიტუციითაა დაცული, მაგრამ ინდოელ ქრისტიანებზე თავდასხმათა რიცხვი 2014 წლის შემდეგ მკვეთრად გაიზარდა, როცა ქვეყნის სათავეში ინდოეთის სახალხო პარტია მოექცა. 

აღსანიშნავია, რომ ორგანიზაცია „Open Doors“-ის მონაცემების მიხედვით, მსოფლიოს ქვეყნებს შორის ინდოეთი მე-10 ქვეყანაა, სადაც ქრისტიანებს ძლიერ დევნიან.