2020 წლის არჩევნები აშშ-ში მთელი მსოფლიოს დაკვირვების ქვეშ იყო მოქცეული. ნოემბრის შემდეგ შეერთებულ შტატებში მთავარი თემა არჩევნები გახლდათ, რომელმაც კორონავირუსული პანდემიაც კი უკან ჩამოიტოვა. ქრისტიანების ფავორიტი პრეზიდენტობის კანდიდატი დონალდ ტრამპი არჩევნებში დემოკრატმა ჯო ბაიდენმა დაამარცხა, რამაც საყოველთაო ვნებათაღელვა გამოიწვია. ტრამპის თქმით და მრავალი მხარდამჭერის აზრით, არჩევნები გაყალბდა. ხელისუფლების შეცვლის არალეგიტიმურად აღიარებამ ვითარების დაძაბვა გამოიწვია საზოგადოებაში.
სწორედ 2021 წლის დასაწყისში აშშ-ის ერთ-ერთმა ცნობილმა ევანგელისტმა რიკ უორენმა განვლილი წელი შეაჯამა, ქრისტიანებს საკუთარი მსოფლმხედველობის გადამოწმებისკენ მოუწოდა და პოლიტიკური ვითარება ასე შეაფასა:
„ბევრი ქრისტიანი იღებს გადაწყვეტილებებს პოლიტიკური და არაბიბლიური ღირებულებების საფუძველზე და ეს რეალური პრობლემაა. არჩევნების მიმდინარეობამ ცხადყო, რომ ქრისტიანთა უმრავლესობას არ აქვს ბიბლიური მსოფლმხედველობა. ისინი ხმას აძლევენ პოლიტიკური მსოფლმხედველობიდან გამოდინარე. მათი ვინაობა და იდენტობა ხშირად პოლიტიკური კუთვნილებიდან გამომდინარეობს. თუ ვინმე იკითხავს, იესო მემარჯვენეა თუ მემარცხენე, იესო უპასუხებს: „მე არცერთ ფრთას არ წარმოვადგენ“. იესო ამბობს, რომ მისი მეფობა ამქვეყნიური არ არის. ჩვენ ურყევი სამეფო გვაქვს ზეცაში.
ყველა დიქტატორი კვდება და ყველა პრეზიდენტი მიდის, იესო კი სამუდამოდ მეფობს. არ არის მნიშვნელოვანი, ვინ აირჩევა პრეზიდენტად. ჩვენი მხსნელი არ არის ის, ვინც თეთრ სახლში დავსვით, არამედ ის, ვინც ჯვარზე ეწამა. არცერთი პოლიტიკოსი არ აპირებს ჩვენს გადარჩენას. მხოლოდ იესოა მხსნელი.“
შეგახსენებთ, რომ გუშინ, კონგრესის სხდომაზე, სადაც ჯო ბაიდენის კანდიდატურა უნდა დამტკიცებულიყო, ტრამპის მომხრეები შეიჭრნენ, რასაც სროლა და არეულობა მოჰყვა. ინციდენტმა საერთაშორისო კრიტიკა გამოიწვია ტრამპისა და მისი მომხრეების მიმართ. კაპიტოლიუმში ტრამპის მხარდამჭერების შეჭრის შემდეგ აშშ-ს კონგრესმა მუშაობა განაახლა