ბაიდენის ადმინისტრაციამ განაახლა შავკანიანი ქრისტიანის, ჰარიეტ ტაბმენის, ოცდოლარიან კუპიურაზე გამოსახვასთან დაკავშირებული გეგმის განხილვა. საკითხის განხილვა შეჩერებული იყო დონალდ ტრამპის ფინანსთა მინისტრის მიერ.
მილიონობით ადამიანმა დაუჭირა მხარი ჰარიეტ ტაბმენის სახის გამოსახვას ოცდოლარიან კუპიურაზე, მაგრამ ძალიან ბევრმა ჯერ კიდევ არაფერი იცის ტაბმენის ისტორიის შესახებ, რომლის მიხედვითაც 2019 წელს გადაიღეს ფილმი „ჰარიეტი“.
ჰარიეტ ტაბმენი თავიდან მონა გახლდათ. მისი საქმიანობა განუყოფლად იყო დაკავშირებულ მის ქრისტიანულ რწმენასთან. ტაბმენის ნამდვილი სახელი იყო არამინტა როსი. ის 1822 წელს დაიბადა მერილენდში. შემდგომში ის იხსენებდა, რომ 5 წლისამ დაიწყო მოსამსახურედ მუშაობა, იტანდა შიმშილს, ცემას და მძიმე შრომას. მოზარდობისას კი მერილენდის თამბაქოს პლანტაციებში უწევდა მუშაობა. შემდეგ გაიქცა და მთელი ცხოვრების განმავლობაში სხვებსაც ეხმარებოდა მონობიდან გათავისუფლებაში. მონათმფლობელები მათ პოვნაში დიდ ჯილდოებს აწესებდნენ. ტაბმენი არასდროს დაუჭერიათ, რადგან არ იცოდნენ, რომ ის ათავისუფლებდა მონებს. მან, დაახლოებით, 60-დან 80-მდე ადამიანის დახსნა შეძლო.
როდესაც ამერიკაში სამოქალაქო ომი დაიწყო, ტაბმენი მუშაობდა ამერიკის არმიაში. იგი მუშაობდა მზარეულად და მედდად. მოგვიანებით ის იყო შეიარაღებული სკაუტი და ჯაშუში. ის ხელმძღვანელობდა მდინარე კომბეჰეს თავდასხმას, რომელმაც 700-ზე მეტი მონა გაათავისუფლა. ომის დამთავრების შემდეგ კი ქალებისათვის თანაბარი უფლებების მინიჭებისათვის იბრძოდა.
ჰარიეტ ტაბმენი 1913 წელს, 90 წლის ასაკში გარდაიცვალა.