ჩინეთის კომუნისტური პარტია რადიკალურ ნაბიჯებს დგამს ქრისტიანულ ეკლესიებთან მიმართებით, რათა ქრისტიანებს ხელი შეუშალოს შეკრებასა და ღვთისმსახურებების ჩატარებაში.
ჩინეთში რელიგიური თავისუფლებისა და ადამიანთა უფლებადამცველი ჟურნალის Bitter Winter-ის ინფორმაციით, ადგილობრივ ხელისუფლებათა წარმომადგენლები გადამწყვეტ ზომებს მიმართავენ იმისათვის, რომ ეკლესიების შენობები ან დაანგრიონ ან დანიშნულება შეუცვალონ, მაგალითად, გადააკეთონ ქარხნებად, გასართობ ობიექტებად ან კომუნისტური პარტიის პროპაგანდის ცენტრებად. დაახლოებით, 70 პროტესტანტული ეკლესიის შენობა დაიხურა გასულ წელს ძიანსუს პროვინციის ქალაქებში: ლიანიუნგანსა და სუციანში.
სუციანში მცხოვრებმა ერთ-ერთმა ქრისტიანმა Bitter Winter-თან განაცხადა, რომ ეკლესია Three-Self Church გადააკეთეს ჩინეთის რევოლუციის გმირების მემორიალურ დარბაზად.
21 ოქტომბერს, ჰენანის პროვინციის სიაის რეგიონში დაანგრიეს ეკლესიის შენობა იმ მიზეზით, რომ ახალი კლინიკა აეშენებინათ მის ადგილზე.
5 ივნისს ჩინეთის მთავრობამ დაიქირავა მუშები იმისათვის, რომ მოეხსნათ ჯვარი ერთ-ერთი ეკლესიის შენობიდან და ასევე დიდი სვეტი, რომელზეც ეწერა: „ღმერთს უყვარს ქვეყნიერება“. ხსენებული წარწერის ნაცვლად ეკლესიის შესასვლელში დადგეს დაფა წარწერით: „ჰუაიჰაის რეგიონის სამხედრო და პოლიტიკური აუდიტორია“.
„ეკლესიას ამის შემდეგ გამოიყენებენ იმისათვის, რომ ახალგაზრდებს აქ ჩინეთის რევოლუციური სულისკვეთების შესახებ ასწავლონ.“ – განმარტა სოფლის მმართველობის წარმომადგენელმა.
„ბოლო დროს მორწმუნე ადამიანთა რიცხვი აჭარბებს კომუნისტური პარტიის წევრთა რაოდენობას და პარტია ვერ ახერხებს ადამიანების გულების მოგებას. მთავრობა ეკლესიების აღმოფხვრას ცდილობს, რათა დარწმუნდეს, რომ კომუნისტური პარტიის წევრთა რაოდენობა მორწმუნეებზე მეტი იქნება.“– განაცხადა სოფლის მმართველობის სხვა წარმომადგენელმა.
შეგახსენებთ, რომ ბოლო წლებში ჩინეთში აქტიურად მიმდინარეობს ქრისტიანთა დევნა. ზოგიერთ პროვინციაში ფულადი ჯილდოც კი დააწესეს იატაკქვეშა ეკლესიების საქმიანობის გამოაშკარავებისთვის.
ორგანიზაცია Open Doors-ის 2020 წლის მონაცემების მიხედვით ჩინეთი 23-ე ადგილზეა ქრისტიანთა დევნის მხრივ მსოფლიოში.