ტელემახარებელი ჯიმი სვაგერტი სამშაბათს, 1 ივლისს, გულის გაჩერების შედეგად გარდაიცვალა. ის 90 წლის იყო.
ჯიმი სვაგერტი გახლდათ ცნობილი ტელემახარებელი, გოსპელის მგალობელი და ორმოცდაათზე მეტი ქრისტიანული წიგნის ავტორი. სვაგერტმა ყველაზე დიდი პოპულარობა 1980-იანი წლების დასაწყისში მოიხვეჭა, როცა მისი ტელეგადაცემა სამი ათასზე მეტი სატელევიზიო არხის მეშვეობით გადაიცემოდა ყოველკვირეულად. 1990-იანი წლების დასაწყისში მისი ტელეპროგრამები ყოფილი საბჭოთა კავშირის ტერიტორიაზეც კი ხელმისაწვდომი იყო.
მის მიერ დაარსებულმა მსახურებამ გაავრცელა განცხადება: „დღეს ჩვენი გულები სევდით არის სავსე, რადგან ვაცხადებთ, რომ ძმა სვაგერტმა დაასრულა თავისი მიწიერი სარბიელი და შეაბიჯა თავისი მხსნელის, იესო ქრისტეს, თანდასწრებაში. დღეს ის დღე იყო, რომლის შესახებაც იგი ათწლეულების განმავლობაში გალობდა. მან იხილა თავისი საყვარელი მხსნელი და დიდების კარიბჭეში შევიდა. მწუხარებასთან ერთად ჩვენ ვხარობთ, რადგან ვიცით, რომ ოდესღაც კვლავ შევხვდებით მას“.
სვაგერტს 15 ივნისს გული გაუჩერდა. სამედიცინო პერსონალმა შეძლო გულის მუშაობის აღდგენა. ის კლინიკაში გადაიყვანეს, თუმცა, მიუხედავად შემდგომი მკურნალობისა, ის ვეღარ გამოვიდა მდგომარეობიდან.
„ძმა სვაგერტი შვიდ ათწლეულზე მეტი ხნის განმავლობაში ქადაგებდა სახარებას, წერდა ქრისტიანულ საგალობლებს და მილიონობით ადამიანს იესო ქრისტეს ხსნის ძალასა და სულიწმიდით მონათვლაზე მიუთითებდა. მისი ხმა სწვდებოდა ხალხებს, მისი მუსიკა ეხებოდა ადამიანთა გულებს და მისი უწყებაც მუდამ უცვლელი იყო: ჯვარცმული იესო ქრისტე“, – ვკითხულობთ ჯიმი სვაგერტის მიერ დაარსებული მსახურების განცხადებაში.
„ის უბრალოდ მქადაგებელი არ იყო — ის იყო თაყვანისმცემელი, მებრძოლი და ღვთის მადლისა და წყალობის მოწმე. ის გახლდათ მტკიცე რწმენის კაცი, რომელიც ყოველთვის შედიოდა იმ კარში, რომელსაც უფალი უღებდა“.
ორმოცდაათიანულ ეკლესიათა გაერთიანების წარმომადგენელმა, დაგ ქლეიმაც გაავრცელა განცხადება: „ღრმად დავმწუხრდი, როცა გავიგე მახარებელ ჯიმი სვაგერტის გარდაცვალების ამბავი. მისი ცხოვრება და მსახურება უამრავ ადამიანს შეეხო და წარუშლელი კვალი დატოვა“.
გეინსვილის (ჯორჯია) ეკლესიის (Free Chapel) ხუცესმა, ჯენტეზენ ფრანკლინმა, CBN News-ს განუცხადა, რომ სვაგერტმა „დაასრულა უფრო კარგად, ვიდრე დაიწყო“.
„დღეს პატივს მივაგებთ დიდი ადამიანის ცხოვრებასა და მემკვიდრეობას. მისი ოჯახი აგრძელებს მის მემკვიდრეობას. მეტი რა შეიძლება სურდეს ადამიანს? იგი საბოლოოდ სახლში დაბრუნდა“.
წყარო: cbn.com