ბოლო 24 საათის განმავლობაში ღაზის სექტორიდან დაჯგუფება „ჰამასმა“ ისრაელის მიმართულებით 200 რაკეტა ისროლა, აქედან მინიმუმ 7 – იერუსალიმის მიმართულებით. რაკეტებმა იერუსალიმში განგაშის ხმოვანი სიგნალი ჩართო. რაკეტების უმეტესობა ისრაელის საჰაერო თავდაცვის სისტემამ, „რკინის გუმბათის“ სახელით ცნობილმა Iron Dome-მა გაანეიტრალა. საპასუხოდ ისრაელმა ღაზის სექტორში „ჰამასის“ 8 ობიექტი დაბომბა.
სარაკეტო თავდასხმა მას შემდეგ დაიწყო, რაც ისრაელმა „ჰამასის“ ულტიმატუმი, დაეტოვებინათ ალ-აქსას ტერიტორია სამართალდამცველებს, არ შეასრულა. ტერორისტულმა დაჯგუფებამ თავდაპირველად იერუსალიმის მიმართულებით 7 რაკეტა ისროლა, შემდეგ კი ცეცხლი გახსნა სხვა ქალაქების მიმართულებითაც. ისრაელზე სარაკეტო თავდასხმის გამო, ქვეყანაში საგანგებო მდგომარეობა გამოცხადდა.
„ეს არის გზავნილი, რომელსაც მტერი გარკვევით გაიგებს.“ – თქვა „ჰამასის“ შეიარაღებული ძალების მეთაურმა, აბუ უბაიდამ.
პრემიერ-მინისტრ ნეთანიაჰუს თქმით, „ჰამასმა“ წითელი ხაზი გადაკვეთა და ისრაელიც მთელი თავისი ძალით უპასუხებს: „ისრაელის პასუხი ძალიან ძლიერი იქნება. ჩვენ არ მოვითმენთ თავდასხმას ჩვენს ტერიტორიაზე, ჩვენს დედაქალაქზე, ჩვენს მოქალაქეებსა და ჯარისკაცებზე.“
უახლესი მონაცემებით, „ჰამასის“ რაკეტებით თავდასხმის შედეგად, დაშავდა ისრაელის 7 მოქალაქე. ისრაელის საპასუხო ცეცხლს კი ღაზის სექტორში 24 ადამიანის სიცოცხლე ემსხვერპლა.
სარაკეტო თავდასხმების გამო, საქართველოს საელჩო ისრაელში მყოფ მოქალაქეებს აფრთხილებს:
„დაიცავით უსაფრთხოების ზომები, თავი შეიკავეთ ქუჩაში გასვლისგან, მოიკითხეთ რაკეტსაწინააღმდეგო თავშესაფარი თქვენს საცხოვრებელ ადგილთან ახლოს. არ გახვიდეთ აივანზე და მოერიდეთ ფანჯარასთან ყოფნას.“
შეგახსენებთ, რომ დაპირისპირება ებრაელებსა და პალესტინელებს შორის თითქმის ერთი კვირაა გრძელდება. დაპირისპირების მიზეზი ისრაელის ხელისუფლების მიერ პალესტინელი ოჯახების გასახლების შესახებ მიღებული გადაწყვეტილებაა. არეულობა იერუსალიმში ისრაელის უზენაესი სასამართლოს მიერ დაგეგმილი სხდომის წინ დაიწყო, რომელზეც შეიხ ჯარას რაიონიდან 70 პალესტინელი ოჯახის გასახლების საკითხი უნდა განხილულიყო, თუმცა ისრაელის გენერალური პროკურორის მოთხოვნით, სხდომა 30 დღით გადაიდო.
ალ-აქსას მეჩეთში, სადაც ათასობით პალესტინელი შეიკრიბა, მათ ისრაელის საწინააღმდეგო ფრაზების სკანდირება დაიწყეს, რასაც ადგილზე მობილიზებულ პოლიციასთან მწვავე დაპირისპირება მოჰყვა.