ერაყის დედაქალაქ ბაღდადში არსებული ეკლესია 10 წლის შემდეგ პირველად აღნიშნავს შობას. ცნობილია, რომ 2010 წელს ტერორისტულმა დაჯგუფებამ „ალ-ქაიდა“, ათობით მორწმუნე უმოწყალოდ დახოცა.
ერთ-ერთმა მსხვერპლმა, ნავრას საბახ უილიამმა, რომელიც მაშინ 18 წლის იყო, თქვა რომ ამდენი წელი ვეღარ გრძნობდა შობის დღესასწაულის დიდებულებას.
„ახლა არავინ ფიქრობს და არავის ეშინია ეკლესიაში წასვლის იმ აზრით, რომ უკან ვეღარ დაბრუნდება.“ – თქვა მან.
წელს საშობაოდ ეკლესიას სამართალდამცავები დაიცავენ, ხოლო მორწმუნეები 10 წლის შემდეგ პირველად, სიმშვიდეში აღნიშნავენ იესოს დაბადებას.
ერაყის ქრისტიანული საზოგადოება მრავალი წლის განმავლობაში კონფლიქტისა და მიზანმიმართული შეტევების მოწმე იყო, რის გამოც ბევრი იძულებული გახდა, ქვეყნიდან გაქცეულიყო. სამი ათწლეულის წინ მოსახლეობა 1,4 მილიონს აღწევდა, ახლა კი ეს რიცხვი 400,000-მდე შემცირდა.
2017 წელს ერაყელმა ქრისტიანმა დეპუტატმა, ჯოზეფ სლევმა განუცხადა სააგენტო Anadolu-ს, რომ ერაყელ ქრისტიანთა 75% (დაახლოებით 1,5 მილიონი ქრისტიანი) 2003 წლიდან მოყოლებული, იძულებული გახდა, ქვეყნიდან წასულიყო.
შობამდე რამდენიმე დღით ადრე, ერაყის პარლამენტმა გამოაცხადა, რომ შობა ოფიციალურად ყოველწლიური ეროვნული დღესასწაული გახდება.
შობის ღამეს ბაღდადში, წმინდა იოსების საკათედრო ტაძარში, ერაყის სუნიტმა მუსლიმანმა პრეზიდენტმა, ბარჰამ სალიჰმა თქვა, რომ მთავრობამ „სერიოზული ძალისხმევით უნდა იმოქმედოს იმისთვის, რომ ერაყელი ქრისტიანები დაბრუნდნენ და თავიანთ სამშობლოში უსაფრთხოდ და ღირსეულად იცხოვრონ. ბოლო წლების განმავლობაში, ერაყის ქრისტიანებმა განიცადეს დიდი შევიწროება და ტანჯვა ექსტრემიზმისა და ტერორიზმის გამო. ამან კი გამოიწვია ის, რომ ქვეყანამ დაკარგა ადამიანური კაპიტალი, რადგან უამრავი ქრისტიანი იძულებული გახდა, დაეტოვებინა სახლები, ბევრი მათგანი კი მოკლეს.“
რომის პაპმა ფრანცისკემ ცოტა ხნის წინ განაცხადა, რომ მარტის დასაწყისში პირველად ეწვევა ერაყს. დაგეგმილია მისი სტუმრობა დედაქალაქ ბაღდადში, ქალაქ ურსა და ნინევიის პროვინციის ქრისტიანულ ცენტრში.
მარტინ ბანნი, ბაღდადის ღვთისმშობლის მიძინების ეკლესიის ხუცესი, პაპის გადაწყვეტილებას „დიდ, შესანიშნავ საშობაო საჩუქარს“ უწოდებს.
ერაყელები იმედოვნებენ, რომ პაპის ვიზიტი თავიანთ ქვეყანაში ხელს შეუწყობს ქვეყნის დემოგრაფიული პრობლემების მოგვარებას და ქრისტიანთა უფლებების პრივილეგირებას.