ისლამური სახელმწიფოს მიერ დახოცილი ეგვიპტელი ქრისტიანებიდან უკანასკნელის ნეშტი დანარჩენ წამებულთა გვერდით დაკრძალეს. 21 კოპტი წამებულიდან ერთ-ერთის, მეთიუ აიარიგას ნეშტი ლიბიის ხელისუფლებამ ეგვიპტელ ქრისტიანებს გასულ თვეს გადასცა.
შეგახსენებთ, რომ 2015 წლის თებერვალში მეთიუ აიარიგას და სხვა ოც კოპტ ქრისტიანს თავი მოჰკვეთეს ლიბიის ქალაქ სურთის სანაპიროზე. ისინი ქალაქში სამუშაოდ ჩასული მიგრანტები იყვნენ. ისლამური სახელმწიფოს წევრებმა მოიტაცეს ისინი და ცოტა ხანში მათი მკვლელობის ამსახველი ვიდეო გამოაქვეყნეს. ვიდეოში ჩანდა მუხლებზე მდგარი, ნარინჯისფერ სამოსში ჩაცმული 21 მამაკაცი. ზოგიერთი მათგანი ლოცულობდა სიკვდილის წინ.
დახოცილ მამაკაცთა სხეულები, ოცი მათგანის, 2018 წელს დააბრუნეს ეგვიპტეში, ხოლო მეთიუ აიარიგას ნეშტის დაბრუნება მშობლიურ მიწაზე მხოლოდ გასულ თვეს მოხერხდა.
კაიროში მოღვაწე ჟურნალისტი ფარიდ ი. ფარიდი „ტვიტერზე“ წერს, რომ აიარიგამ დანარჩენ წამებულთა გვერდით განისვენა.