2020 წელს პანდემიით გამოწვეული სიტუაციის გამო უამრავ ადამიანს მოუწია, დღესასწაულები სახლში აღენიშნა.
საიტ Hymnary.org-ის მონაცემთა მიხედვით, უამრავმა ქრისტიანმა დაიწყო საგალობლების სახლში მოსმენა და გალობა. ონლაინმომხმარებელთა რაოდენობა გაორმაგდა, რადგან უამრავ ადამიანს სახლიდან უწევდა ქადაგებებისა თუ საგალობლების მოსმენა.
„ვფიქრობ, ისეთ პერიოდში გვიწევს ცხოვრება, როდესაც ყველაფერი ძირფესვიანად იცვლება. ყველა ცდილობს გამოსავლის პოვნას, სწორედ ეს უხსნის მათ გზებს ღვთის ძიებისა. დღესდღეობით ბევრი ადამიანი ეძებს ღმერთს.“ – ამბობს საიტ Hymnary.org-ის დამფუძნებელი და კალვინის უნივერსიტეტის კომპიუტერულ მეცნიერებათა ფაკულტეტის პროფესორი ჰარი პლანტინგა.
Hymnary.org არის მუსიკალურ მონაცემთა ონლაინბაზა გალობის გუნდის ხელმძღვანელებისთვის, მგალობელთათვის და მუსიკის ყველა მოყვარულისთვის. აღნიშნული ონლაინბაზა მოიცავს 1 მილიონზე მეტ საგალობელს.
პლანტინგამ 2007 წელს შექმნა ეს საიტი, ახლა ის ჟან კალვინის ქრისტიანული თაყვანისცემის ინსტიტუტის (CICW) მიერ ფინანსდება გრანდ რეპიდსში, მიჩიგანში.
მონაცემთა ბაზის მიხედვით, წლევანდელი ერთ-ერთი ყველაზე ხშირად მოსმენილი საგალობელი არის „წმინდა, წმინდა, წმინდა უფალი, ღმერთი ყოვლისშემძლე“(Holy, Holy, Holy! Lord God Almighty) და სხვა 1826 საგალობელი, რომელიც ღვთის სიწმინდეზე საუბრობს.