Bible Gateway გახლავთ ვებგვერდი, რომელიც 28 წლის წინ შეიქმნა და რომელსაც მილიონობით ადამიანი იყენებს ბიბლიური ტერმინების მოსაძებნად და ასევე ბიბლიის ტექსტის წასაკითხად. წლის მიწურულს გვერდმა გამოაქვეყნა იმ ბიბლიური ტერმინების ჩამონათვალი, რომელი ტერმინებითაც ყველაზე მეტი ადამიანი დაინტერესდა წლის განმავლობაში. საძიებო სიტყვების პოპულარობა გვიჩვენებს, თუ რამდენად აინტერესებთ ადამიანებს ბიბლიის შეხედულება ამა თუ იმ საკითხზე.
რაოდენ გასაკვირიც არ უნდა იყოს, ვებგვერდ Bible Gateway-ს საძიებო სისტემაში 2021 წელს ყველაზე ხშირად ჩაწერილი სიტყვა გახლდათ „ჯადოქრობა“.
„ბიბლიური თემები, რომლებსაც ხალხი ჩვენს ვებგვერდზე ეძებს ყოველ წელს, ყოველთვის საინტერესოა, მაგრამ წელს ალბათ ყველაზე საინტერესო და ცნობისმოყვარეობის აღმძვრელია.“ – ვკითხულობთ Bible Gateway-ს მიერ გამოქვეყნებულ წლის მიმოხილვაში.
გარდა ამ სიტყვისა, ვებგვერდის საძიებო სისტემაში ასევე ბევრი ადამიანი წერდა სიტყვებს „სულგრძელი“ და „მრავალმოწყალე“. წელს ამ სიტყვების ძიება 169%-ით გაიზრდა; ფრაზის – „ყოველივე ძალმიძს ჩემს განმამტკიცებელში, ქრისტეში“ – ძიებამ იმატა 102%-ით, ხოლო ფრაზისა „თქვენი სხეული ტაძარია“ – 77%-ით.
სიტყვები: სიყვარული, იმედი, სიხარული და რწმენა შედიოდა ასევე ყველაზე პოპულარულ საძიებო სიტყვებს შორს 2021 წელს.
ბიბლიის ორმა მუხლმა − იოანეს 3:16 და იერემიას 29:11 − მიიღო წლის ყველაზე პოპულარული ბიბლიური მუხლების ტიტული.
ვებგვერდი Bible Gateway დაარსდა 1993 წელს. საძიებო სისტემის მქონე ეს ონლაინბიბლია ხელმისაწვდომია 70-ზე მეტ ენაზე. ასევე მისი მეშვეობით შეგიძლიათ ისარგებლოთ ბიბლიის ინგლისური თარგმანების 200-ზე მეტი ვერსიით.