27 იანვარს მსოფლიოში, მათ შორის საქართველოში, ჰოლოკოსტის ხსენების საერთაშორისო დღეს აღნიშნავენ. 1945 წლის 27 იანვარს აუშვიცის საკონცენტრაციო ბანაკის ათასობით ტყვე გათავისუფლდა. დღეს ამ თარიღიდან 76 წელი გავიდა.
გაეროს გენერალური ასამბლეის 2005 წლის გადაწყვეტილებით, ეს დღე ჰოლოკოსტის მსხვერპლთა ხსოვნის დღედ დაწესდა.
Times of Israel-ის თანახმად, ზოგიერთმა სათემო ორგანიზაციამ წელს 27 იანვრის თემად აირჩია 1.5 მლნ-ზე მეტი ებრაელი ბავშვის მოგონება, რომლებიც ნაცისტურმა გერმანიამ სასტიკად ამოხოცა. გამოცემის მიხედვით, კიდევ ერთი საკითხი, რაზეც ჰოლოკოსტის ხსენების წლევანდელ დღეს სათემო ორგანიზაციები ამახვილებენ ყურადღებას, გენოციდის უარყოფაა, რომელიც, ანტისემიტიზმთან ერთად, მსოფლიოში სხვადასხვა ფორმით კვლავ მძვინვარებს.
ჰოლოკოსტის მსხვერპლი 6 მილიონი ებრაელის მოსაგონებლად გაიმართება ცერემონია, რომელშიც მონაწილეობას მიიღებენ ევროპისა და აშშ-ს ლიდერები და ჰოლოკოსტს გადარჩენილი ადამიანები. ვირტუალური ცერემონია საქართველოს დროით 22:00-ზე დაიწყება.
შეგახსენებთ, რომ სიტყვა ჰოლოკოსტი სრულიად დაწვას ნიშნავს და 1933–1945 წლებში გერმანიის ნაცისტური ხელისუფლების და მისი მოკავშირეების მიერ გახორციელებული ებრაელებისა და სხვა უმცირესობების გენოციდის აღსანიშნავად დამკვიდრდა. ჰოლოკოსტს 6 მლნ-ზე მეტი ებრაელი ემსხვერპლა.