3 პაკისტანელ ქრისტიანს ბრალად სდებდნენ ღვთის გმობას ყურანის გვერდების დაწვისთვის. პაკისტანში ღვთის გმობისთვის სასჯელი სიკვდილით დასჯაა. პენჯაბის პროვინციის ნაროვალის რაიონში მცხოვრები მუსლიმანების თქმით, ქრისტიანებმა შეურაცხყვეს მათი რელიგიური გრძნობები.
პოლიციამ მუსლიმანთა ჩვენების საფუძველზე ბრალდება წაუყენა სამ ქრისტიანს: აზემ მაჰმუდს, აბას გულშანს და ირფან სალემს. სასამართლომ პატიმრობაში დატოვა მაჰმუდი, რომელიც პაკისტანის არმიის წევრია, ხოლო დანარჩენ ორ ქრისტიანს გირაო დააკისრა.
25 დეკემბერს, საშობაო წირვის დასრულების შემდეგ, როდესაც გაერთიანებული პრესვიტერიანული ეკლესია საზეიმო მსვლელობას მართავდა, პოლიციელები მივიდნენ და განაცხადეს, რომ მიიღეს საჩივარი ქრისტიანების მიერ ყურანის ფურცლების დაწვის შესახებ.
მუსლიმანებმა პოლიციას ნაცრის გროვა აჩვენეს, რომელშიც ლურჯი საფოსტო ყუთის ნაგლეჯები მოჩანდა. ეს ყუთი ყურანის ფურცლების შესაგროვებლად იყო მიკრული კედელზე. ადგილობრივმა ილიას მასიჰმა განუცხადა პოლიციას, რომ მან ხანძრის გარშემო რამდენიმე ახალგაზრდა ნახა, მაგრამ ვერ დაინახა მათი სახე სქელი კვამლის გამო.
იმავე დღეს, მეჩეთთან, პარასკევის ლოცვის შემდეგ, სოფელში შეიკრიბა გაბრაზებულ მაჰმადიანთა ბრბო, რომელიც ირგვლივ მდებარე სოფლებიდან ითხოვდა ყველა ქრისტიანის დაუყოვნებლივ დაპატიმრებას, რასაც მოჰყვა კიდეც 3 ქრისტიანის დაკავება. ადგილობრივი მორწმუნეები ვარაუდობენ, რომ პოლიციამ აიძულა ილიას მასიჰი, „ამოეცნო“ ხანძრის მონაწილე ახალგაზრდები.
„ძალიან სამწუხაროა, რომ გმობა კვლავაც გამოიყენება, როგორც მარტივი იარაღი ქრისტიანებისა და სხვა რელიგიური უმცირესობების წინააღმდეგ მათ დასაპატიმრებლად.“ – თქვა ნასირ საიდმა, ორგანიზაცია CLAAS-ის დიდი ბრიტანეთის დირექტორმა.
ICC-ის თანახმად, პაკისტანში ღვთის გმობის ბრალდებით, სულ მცირე, 24 ქრისტიანი იმყოფება პატიმრობაში.