ტიმ კელერი – ცნობილი ამერიკელი ხუცესი და თეოლოგი გარდაიცვალა

ტიმოთი ჯეიმს კელერი (1950-2023) ამერიკელი ხუცესი, თეოლოგი და ქრისტიანი აპოლოგეტი 19 მაისს, 72 წლის ასაკში გარდაიცვალა. ტიმოთი კელერმა 1989 წელს დააარსა ნიუ-იორკის პრესვიტერიანული ეკლესია (Redeemer Presbyterian Church), რომელიც მალე იქცა მზარდ და გავლენიან ეკლესიად და რომლის მეშვეობითაც ჩამოყალიბდა რამდენიმე მნიშვნელოვანი მსახურება, მათ შორის, ორგანიზაცია Redeemer City to City, რომელიც მსახურებისათვის ამზადებს ხუცესებს მთელი მსოფლიოს მასშტაბით. მას შემდეგ, რაც 2017 წელს ტიმ კელერი გადადგა უფროსი ხუცესის თანამდებობიდან, მან მთლიანად მიუძღვნა თავი ზემოხსენებულ ორგანიზაციაში მსახურებას, რომლის დახმარებითაც 1000 ეკლესია იქნა დაარსებული 150-ზე მეტ ქალაქში. ტიმ კელერი 31 წიგნის ავტორია, რომელთაგან ყველაზე ცნობილია „ნიუ-იორკ ტაიმსის“ სიის ბესტსელერი წიგნები: „უძღები ძე: ქრისტიანული რწმენის საფუძვლების აღორძინება“, „ლოცვა: მოწიწებისა და სიახლოვის განცდა ღმერთის წინაშე“, „გონება ღმერთისათვის: რწმენა სკეპტიციზმის ეპოქაში“.