მშვიდობა ისეთი რამაა, რომელსაც ვერ დაინახავ, ვერც ხელით შეეხები, მაგრამ თუ ის არ გაქვს, ძილიც კი არ გექნება ნორმალური. მშვიდობა გულში არის ის, რაც უმნიშვნელოვანესია ყველა ადამიანისთვის. ზოგჯერ შეცდომებს ვუშვებთ, ან ვერ ვუმკლავდებით ცხოვრებისეულ გამოწვევებს და სიმშვიდეს ვკარგავთ, აფორიაქება გვიპყრობს და შინაგანი ღელვა მოგვიცავს. ასეთ დროს უნდა მივმართოთ იმას, ვინც თავადაა სიმშვიდის წყარო. ზოგჯერ უბრალოდ ხელი უნდა გავუშვათ კონტროლის საჭეს, რომ მშვიდობა ვიპოვოთ და ღმერთს მივენდოთ. უნდა გავიაზროთ, რომ ღელვა და ნერვიულობა არა მარტო ჩვენს ცხოვრებას ამახინჯებს, არამედ უნდობლობის გამოხატულებაა ღვთისადმი. გარდა იმისა, რომ ნერვიულობა სიმშვიდეს და სიხარულს გვპარავს, მას არაფრის შეცვლა არ ძალუძს კარგისკენ. თუ ადგილს ვერ პოულობთ, თუ მშვიდი ძილი დაკარგეთ და არ იცით, როგორ მოიქცეთ, მიმართეთ ბიბლიას, ის ცოცხალი და მოქმედია, უზენაესი ღმერთის სიტყვაა და ჩვენი ცხოვრების შეცვლა ძალუძს.
და ღვთის მშვიდობა, რომელიც ყოველგვარ გონებას აღემატება, დაიფარავს თქვენს გულებს და თქვენს ფიქრებს ქრისტე იესოში.
უფალი ძალას მისცემს თავის ხალხს, უფალი აკურთხებს თავის ხალხს მშვიდობით.
თავად მშვიდობის უფალმა მოგცეთ თქვენ მშვიდობა ყოველთვის და ყველგან. უფალი იყოს ყველა თქვენგანთან.
მშვიდობას გიტოვებთ თქვენ, ჩემს მშვიდობას გაძლევთ თქვენ. სოფელი რომ იძლევა, ისე კი არ გაძლევთ. ნუ შეკრთება თქვენი გული და ნურც შეშინდება.
დიდია მშვიდობა შენი რჯულის მოყვარულთა, და არ არსებობს მათთვის დაბრკოლება.
სულს, რომელიც შენ გენდობა, იფარავ მშვიდობაში, რადგან შენზეა მონდობილი.
რაც ჩემგან ისწავლეთ და მიიღეთ, მოისმინეთ და დაინახეთ ჩემში, ის შეასრულეთ და მშვიდობის ღმერთი იქნება თქვენთან.
მოდით ჩემთან, ყოველნო მაშვრალნო და ტვირთმძიმენო, და მე მოგასვენებთ თქვენ. იტვირთეთ ჩემი უღელი და ისწავლეთ ჩემგან, ვინაიდან მე მშვიდი და თავმდაბალი ვარ, და პოვებთ სულის სიმშვიდეს. ვინაიდან ჩემი უღელი ადვილია და ჩემი ტვირთი – მსუბუქი.
ხოლო სასოების ღმერთმა აგავსოთ ყოველგვარი სიხარულით და მშვიდობით რწმენაში, რათა სულიწმიდის ძალით იუხვოთ სასოებაში.
ის შედის მშვიდობაში, განისვენებს თავის სარეცელზე, ვინც დადის თავის სწორ გზაზე.
