ბიბლია ამბობს, რომ უფალი ისმენს და პასუხს სცემს რწმენის ლოცვებს. მიდი მასთან, გადმოღვარე შენი შინაგანი დარდი და საზრუნავი, ელაპარაკე უფალს შენს ლოცვებში, რადგან ლოცვა რიტუალი არ არის, არც დაზეპირებული ჯადოსნური სიტყვებია, ეს საუბარია უფალთან. თუ სიცარიელეს გრძნობ შენს შინაგანში და ეს სიცარიელე გამძიმებს, მიდი ღმერთთან, მას აქვს შენთვის ნუგეში. ილოცე, როცა კარგად ხარ და ილოცე, როცა ცუდად ხარ, ღმერთს შეუძლია შენი სიხარულის და ტკივილის გაზიარება, რადგან იგი ისმენს ჩვენს ლოცვებს და არა მარტო ისმენს, არამედ პასუხს გვცემს კიდეც.
ისმინა უფალმა ჩემი ვედრება; უფალი მიიღებს ჩემს ლოცვას.
როცა სულს ვღაფავდი, უფალი გავიხსენე და ჩემმა ლოცვამ შენამდე მოაღწია, შენს წმინდა ტაძარში.
გაჭირვებაში მომიხმე და გადაგარჩინე, ელვის საფარიდან გიპასუხე, მერიბას წყლებთან გამოგცადე.
მაგრამ ნამდვილად მისმინა ღმერთმა, ყური მოაპყრო ჩემი ლოცვის ხმას.
უფლის თვალები მართლებისკენაა მიპყრობილი და მისი ყურები – მათი ღაღადისკენ.
რადგან უფლის თვალები მიპყრობილია მართალთა მიმართ, ყურები – მათი ვედრების მიმართ; ხოლო მისი სახე ბოროტმოქმედთა წინააღმდეგაა.
მოხედავს მიტოვებულთა ლოცვას და არ უკუაგდებს მათ ვედრებას.