Fox News-ი იუწყება, რომ გასულ კვირაში იერუსალიმში არქეოლოგიური გათხრების დროს აღმოაჩინეს ბიბლიაში ნახსენები შილოახის აუზის კიბეები, სადაც იესო ქრისტემ დაბადებიდან ბრმა კაცი განკურნა. აღმოჩენილია, დაახლოებით, რვა საფეხური.
შილოახის აუზი 2004 წელს აღმოაჩინეს სრულიად შემთხვევით, როდესაც წყალმომარაგების კომპანია Hagihon-ი ინფრასტრუქტურულ სამუშაოებს აწარმოებდა. მაშინ აღმოჩენილი იყო სულ რამდენიმე საფეხური. ამის შემდეგ ისრაელის სიძველეთა სამმართველომ (IAA) ადგილის გამოკვლევა დაიწყო, რის შედეგადაც აღმოჩენილ იქნა შილოახის აუზის ჩრდილოეთ პერიმეტრი და ასევე აღმოსავლეთ პერიმეტრის მცირე ნაწილი.
ახალი ნაწილისა და დამატებითი საფეხურების აღმოჩენა გასულ კვირას მოხდა მას შემდეგ, რაც მიმდინარე წლის დასაწყისში ისრაელის სიძველეთა სამმართველომ, ისრაელის ეროვნული პარკების სამმართველომ და ფონდმა „დავითს ქალაქი“ განაცხადეს, რომ მალე შილოახის უძველესი აუზი 2000 წლის განმავლობაში პირველად გაიხსნებოდა საზოგადოებისთვის. მანამდე ამ ადგილის მხოლოდ მცირე ნაწილი იყო სრულად გათხრილი და საზოგადოებისთვის ღია. მიიჩნევა, რომ შილოახის აუზი ოდესღაც, დაახლოებით, 5058 კვადრატულ მეტრს მოიცავდა. მოსალოდნელია, რომ შემდგომი არქეოლოგიური სამუშაოების ჩატარების შესაბამისად ამ ადგილის სულ უფრო მეტი ნაწილი გაიხსნება საზოგადოებისთვის, რადგან მას დიდი მნიშვნელობა აქვს როგორც ებრაელთათვის, ისე ქრისტიანთათვის.
„ეს ადასტურებს წმინდა წერილს თეოლოგიურად, გეოგრაფიულად თუ პოლიტიკურად; ეს ადასტურებს ისრაელის უდავო და შეუდარებელ კავშირს იერუსალიმთან. ზოგიერთი აღმოჩენა თეორიული ხასიათისაა. ეს აღმოჩენა კი უდავოა. ეს არის ბიბლიისა და მისი ხალხის – ისრაელიანთა ისტორიის მტკიცებულება“. – განაცხადა Fox News-თან საუბრისას ქრისტიან ლიდერთა კონგრესის პრეზიდენტმა, ჯონი მურმა.
შილოახის აუზი, დაახლოებით, 2700 წლის წინ აშენდა. ის გამოიყენებოდა, როგორც იერუსალიმის წყალმომარაგების სისტემის ნაწილი.
შილოახის აუზის რენდერი