მთიან ყარაბაღში მიმდინარე შეიარაღებული კონფლიქტი 2020 წლის 27 სექტემბერს დაიწყო. დანგრეულია ათასობით სახლი და სხვადასხვა დანიშნულების შენობები. მედიასაშუალებების ცნობებით, დაღუპულთა რაოდენობამ ორივე მხრიდან 5 ათასს გადააჭარბა. სომეხი და აზერბაიჯანელი ქრისტიანები ეხმარებიან ომის შედეგად დაზარალებულებს. ბაქოსა და ერევნის „სიცოცხლის სიტყვის“ ეკლესიების ჯგუფები მიდიან საომარ მოქმედებათა ზონაში და საკვებსა და ჰუმანიტარულ დახმარებას ურიგებენ იქ მყოფ ადამიანებს.
„ეკლესია ლოცულობს და მარხულობს ომის შეწყვეტისა და მშვიდობის დამყარებისათვის. მრავალი წელია, ვლოცულობთ ამ საკითხის მშვიდობიანად გადაწყვეტისთვის. დიდი ხანა, რაც საკვებს ვურიგებთ უსახლკარო ადამიანებს და ასეთ რთულ პერიოდშიც ვაგრძელებთ ამ მსახურებას. ახლა ვეხმარებით იმ ოჯახებს, რომლებიც სროლაში მოყვნენ. მათ დაკარგეს ახლობლები, შვილები, ოჯახის მარჩენლები. უპირველეს ყოვლისა, ჩვენ, ქრისტიანები უნდა დავეხმაროთ მათ.“ – თქვა БОГ.NEWS-თან საუბრისას იუსიფ ფარხადოვმა, აზერბაიჯანის „სიცოცხლის სიტყვის“ ეკლესიის უფროსმა ხუცესმა.
ერევნის „სიცოცხლის სიტყვის“ ეკლესია კონფლიქტის გამწვავების დროიდან ეხმარება დაზარალებულებს. ეკლესიამ 150-მდე ბავშვი და მათი დედები გაიყვანა საომარ მოქმედებათა ზონიდან და მათზე ზრუნვის პასუხისმგებლობა საკუთარ თავზე აიღო. ქრისტიანებს რეგულარულად მიაქვთ წყალი და პირველადი მოხმარების ნივთები. 24 ოქტომბრიდან ეკლესიაში 24-საათიანი ლოცვა მიმდინარეობს მშვიდობისათვის.
„ჩვენ იმას ვაკეთებთ, რასაც უნდა ვაკეთებდეთ: ვლოცულობთ, ვმარხულობთ და ბავშვები გამოგვყავს საომარი ზონიდან. ჩვენი ეკლესიის წევრები ამბობენ, რომ შეუძლიათ შეიფარონ საომარ ზონაში მცხოვრები ადამიანები.“ – განაცხადა სომხეთის „სიცოცხლის სიტყვის“ უფროსმა ხუცესმა, არტურ სიმონიანმა. მისივე სიტყვებით, ეკლესიის წევრები 24 საათის განმავლობაში ემსახურებიან დაზარალებულებს. „ბევრი ადამიანი იღუპება ორივე მხარეს. ჩვენი ეკლესიის წევრებიდან მეექვსე ახალგაზრდა დავკრძალეთ უკვე. ძალიან ვწუხვარ… თავზარდამცემია ის, რომ ვეჩვევი დაკრძალვაზე ყოფნას, დაჭრილების მონახულებას. მეშინია იმის, რომ უკვე ვეღარ ვგეგმავ დღეს, არამედ დღე გეგმავს ჩემს ცხოვრებას. დილით ვიღვიძებ და არ ვიცი, რის გაკეთება იქნება საჭირო: დაჭრილებთან წასვლა თუ მგლოვიარე დედასთან.“ – თქვა სიმონიანმა.
შეგახსენებთ, რომ 27 სექტემბერს კონფლიქტის დაწყების შემდეგ სომხეთმა და აზერბაიჯანმა ცეცხლის შეწყვეტის სამ შეთანხმებას მიაღწიეს, თუმცა არ შეუსრულებიათ. ბოლო შეთანხმება აზერბაიჯანსა და სომხეთს შორის ძალაში 27 ოქტომბერს, ვაშინგტონში გამართული შეხვედრების შემდეგ შევიდა. შეთანხმების ძალაში შესვლიდან მალევე, მხარეებმა ერთმანეთი შეთანხმების დარღვევაში დაადანაშულეს.