აშშ-ის დეპარტამენტი ოფიციალურ განცხადებას ავრცელებს, სადაც გმობს თურქეთის პრეზიდენტის, რეჯეფ ტაიპ ერდოღანის ანტისემიტურ განცხადებებს.
აშშ-ის სახელმწიფო დეპარტამენტის ოფიციალური წარმომადგენელი ნედ პრაისი ამბობს:
„შეერთებული შტატები მკაცრად გმობს პრეზიდენტ ერდოღანის ბოლოდროინდელ, ანტისემიტურ განცხადებებს ებრაელ ხალხთან დაკავშირებით. ჩვენ მოვუწოდებთ პრეზიდენტ ერდოღანს და თურქეთის სხვა ლიდერებს, თავი შეიკავონ გამაღიზიანებელი კომენტარებისგან, რამაც შეიძლება გამოიწვიოს შემდგომი ძალადობა. ჩვენ მოვუწოდებთ თურქეთს, შეუერთდეს შეერთებულ შტატებს კონფლიქტის მოგვარების საქმეში. ანტისემიტურ ენას ადგილი არ უნდა ჰქონდეს. აშშ მთელი ძალით ებრძვის ანტისემიტიზმის ყველა ფორმას. ჩვენ სერიოზულად ვეკიდებით ძალადობას, რომელიც ხშირად თან ახლავს ანტისემიტიზმს და მის საშიშ სიცრუეს. ყოველთვის უნდა დავუპირისპირდეთ ცრუ ფაქტებს და სამართლიანად ვუპასუხოთ სიძულვილს.“ – ნათქვამია აშშ-ის სახელმწიფო დეპარტამენტის განცხადებაში.
ნედ პრაისს არ დაუკონკრეტებია, რეჯეფ ტაიპ ერდოღანის რომელ განცხადებას გულისხმობდა იგი შეფასებისას.
შეგახსენებთ, რომ გასულ კვირას ისრაელში განვითრებულ მოვლენებთნ დაკავშირებით, თურქეთის პრეზიდენტ რეჯეფ ტაიპ ერდოღანს პალესტინის ლიდერ მაჰმუდ აბასსა და „ჰამასის“ პოლიტბიუროს ხელმძღვანელ ისმაილ ხანიას შორის სატელეფონო საუბრები შედგა.
ერდოღანმა განაცხადა, რომ ყველაფერს გააკეთებს მთელი მსოფლიოს, განსაკუთრებით კი ისლამური სამყაროს მობილიზებისთვის პალესტინელების წინააღმდეგ ისრაელის ტერორის შესაჩერებლად. მისი თქმით, თურქეთი ყოველთვის დარჩება პალესტინის მომხრედ, იდგება პალესტინელი ძმების გვერდით და დაიცავს იერუსალიმის ღირსებას.
თურქეთის პრეზიდენტი აღნიშნულ საკითხზე იორდანიის მეფე აბდულას და კუვეიტის ემირ შეიხ ნავაფ ალ-აჰმად ალ-საბაჰსაც ესაუბრა. მისი ადმინისტრაციის ინფორმაციით, ერდოღანმა მეფე აბდულას განუცხადა, რომ პალესტინელების წინააღმდეგ განხორციელებული არაადამიანური თავდასხმების სამიზნე ყველა მუსლიმანია და თურქეთმა და იორდანიამ მათ შესაჩერებლად ერთად უნდა იმოქმედონ.