ბრაზილიაში ქრისტეს ახალ ქანდაკებას აგებენ, რომელიც რიო-დე-ჟანეიროში მდებარე ცნობილ ქანდაკებაზე მაღალი იქნება. ფოლადისა და ბეტონისგან შექმნილი კონსტრუქცია სიმაღლეში 43 მეტრი იქნება — რაც 13 მეტრით აღემატება რიოში მდებარე ქანდაკებას.
ორგანიზაციის განცხადებით, ახალი ღირსშესანიშნაობა ასევე იქნება ქრისტეს მესამე ყველაზე მაღალი ქანდაკება მსოფლიოში; იგი ჩამორჩება მხოლოდ მექსიკაში მდებარე 76-მეტრიან და პოლონეთში მდგომ 52-მეტრიან ქანდაკებებს. ახალი ქანდაკების, „მფარველი ქრისტეს“ შემქმნელები მოქანდაკე ჟენესიო გომეს მოურა და მისი შვილი, მარკუს მოურა, არიან.
ღირსშესანიშნაობის დამთვალიერებლები ქანდაკების შიგნით არსებული ლიფტით შეძლებენ, რომ მაღლა, „ქრისტეს გულამდე“ ავიდნენ.
„ამ ადგილას შუშა იქნება, საიდანაც ხედი გადაიშლება და ტურისტებს ფოტოების გადაღების შესაძლებლობა ექნებათ.“ — ამბობს პროექტის ზედამხედველი არტურ ლოპეზ დე სოუზა.
ქანდაკების მშენებლობა 2019 წლის ივლისში დაიწყო და 2021 წლის მიწურულს უნდა დამთავრდეს.