პანდემიის გამო საშობაოდ გერმანიაში შეზღუდვები ხელახლა გაამკაცრეს. შედეგად, დაიხურა არაერთი რესტორანი, მათ შორის ქალაქის ცენტრში მდებარე ერთ-ერთი ყველაზე დიდი რესტორანი Hofbraeu, იგივე HB.
იდეა რესტორნის ერთ-ერთ თანამშრომელს ეკუთვნის, რომელიც უსახლკაროთა თავშესაფარში მოხალისედ მუშაობს და HB-ს მეპატრონეებს შესთავაზა, რომ რესტორანი უსახლკაროებს მომსახურებოდა. იდეა არ დარჩა უყურადღებოდ და პროექტი ქალაქის თვითმმართველობამ და ორმა საქველმოქმედო ორგანიზაციამ დააფინანსა.
რესტორანში ყოველდღიურად 150-ზე მეტ უსახლკარო ადამიანს საკვებით შობის სადღესასწაულო სუფრის სტილში, ფაიფურის თეფშებზე უმასპინძლდებიან. გარდა ამისა, ისინი იღებენ ახალ ტანისამოსს და სამედიცინო კონსულტაციასაც. რესტორანი ბენეფიციარებს აბაზანის გამოყენების და თავის მოწესრიგების საშუალებასაც აძლევს.
„რკინიგზის სადგურზე სხვა უსახლკაროებმა მითხრეს ამ ადგილის შესახებ, აქ ცხელი წვნიანისთვის მოვედი.“ – თქვა ერთ-ერთმა ბენეფიციარმა.
რესტორნის მენეჯერი Associated Press-თან საუბარში ამბობს, რომ სურთ, უსახლკარო ადამიანებს შესთავაზონ უფასო სასადილოებისაგან განსხვავებული, უფრო მრავალფეროვანი საკვები, რომელიც შობის სადღესასწაულო სუფრის სტილში იქნება.
„გარდა იმისა, რომ უსახლკაროებს ვმასპინძლობთ, ეს პროექტი შესანიშნავი დახმარებაა რესტორნისთვის, როგორ ბიზნესისთვის.“ – განაცხადა მენეჯერმა ბ. შვარცმა.
შეგახსენებთ, რომ გერმანიაში საყოველთაო, მკაცრი იზოლაცია გამოცხადდა, დაიხურა კაფე-ბარები, რესტორნები, ტანსაცმლისა და სხვა პროდუქციის მაღაზიები და საგანმანათლებლო დაწესებულებები. ახალი მკაცრი ზომები 10 იანვრამდე იმოქმედებს.