„მინდა, მადლობა გადავუხადო ამერიკელ ხალხს. თქვენი პრეზიდენტობა აღუწერელი პატივია. გმადლობთ ამ არაჩვეულებრივი პრივილეგიისთვის.“ – ამის შესახებ აშშ-ის მოქმედმა პრეზიდენტმა, დონალდ ტრამპმა თავის ბოლო მიმართვაში განაცხადა პრეზიდენტის რანგში.
მისი თქმით, ახალ ადმინისტრაციას წარმატებებსა და იღბალს უსურვებს. გამოსამშვიდობებელ სიტყვაში ის მადლობას უხდის იმ ადამიანებს, რომლებიც პრეზიდენტობის გზის გავლაში დაეხმარნენ, მათ შორის საკუთარი ოჯახის წევრებს, ვიცე-პრეზიდენტ მაიკ პენსსა და მის ოჯახს, გენშტაბის უფროსს, მარკ შედოუს, თეთრი სახლის თანამშრომლებსა და მინისტრთა კაბინეტის წევრებს, საიდუმლო სამსახურს, შეიარაღებულ ძალებსა და სამართალდამცველებს. ტრამპმა კაპიტოლიუმში 6 იანვარს განვითარებულ მოვლენებზეც ისაუბრა და აღნიშნა, რომ გმობს ძალადობას. მისი თქმით, ახლა ამერიკელ ხალხს, როგორც არასდროს, ისე სჭირდება ერთიანობა.
„45-ე პრეზიდენტის ვადის დასრულებისას მე ვდგავარ თქვენ წინაშე ჭეშმარიტად ამაყი იმით, თუ რას მივაღწიეთ ერთად. ჩვენ გავაკეთეთ ის, რისთვისაც მოვედით და გაცილებით უფრო მეტიც. ჩვენ ახალი ადმინისტრაციის ინაუგურაციას ვატარებთ და ვლოცულობთ, წარმატებით შეინარჩუნონ ამერიკის კეთილდღეობა და უსაფრთხოება. ჩვენ მათ საუკეთესოს ვუსურვებთ და ასევე გვსურს, იღბალი ჰქონდეთ, ეს ძალიან მნიშვნელოვანი სიტყვაა… ყველა ამერიკელი შეაძრწუნა კაპიტოლიუმზე განხორციელებულმა თავდასხმამ. პოლიტიკური ძალადობა არის თავდასხმა ყველაფერზე, რასაც ჩვენ, როგორც ამერიკელები ვაფასებთ და ვუფრთხილდებით. ახლა, როგორც არასდროს, უნდა გავერთიანდეთ საერთო ღირებულებების გარშემო და დავდგეთ პირად სიბრაზეზე მაღლა და გამოვჭედოთ ჩვენი საერთო ხვედრი.“ – აცხადებს დონალდ ტრამპი.
ტრამპმა საკუთარი ადმინისტრაციის მიღწევებზე საუბრისას ხაზი გაუსვა, რომ მისი პრეზიდენტობის პერიოდში შესაძლებელი გახდა კორონავირუსის საწინააღმდეგო ორი ვაქცინის რეკორდულად მცირე დროში შექმნა.
„სხვა ადმინისტრაციას 3, 4, 5 ან შესაძლოა, 10-მდე წელი დასჭირვებოდა ვაქცინის შესაქმნელად. ჩვენ ეს ცხრა თვეში გავაკეთეთ.“ – აღნიშნა ტრამპმა.
ამასთან, ყველაზე დიდ მიღწევად მან ის დაასახელა, რომ პირველი პრეზიდენტია ბოლო ათწლეულების განმავლობაში, რომელსაც ახალი ომები არ დაუწყია.
„განსაკუთრებით მეამაყება, რომ ათწლეულების განმავლობაში ვარ პირველი პრეზიდენტი, რომელსაც ახალი ომები არ დაუწყია.“ – აღნიშნა ტრამპმა.
მისი თქმით, მოძრაობა, რომელიც მისი პრეზიდენტობის დროს დაიწყო, მხოლოდ დასაწყისია და იმის რწმენა, რომ ქვეყანა უნდა ემსახუროს თავის მოქალაქეებს, არ გაქრება.
„მე ვიბრძოდი თქვენთვის, მე ვიბრძოდი თქვენი ოჯახისთვის, მე ვიბრძოდი ჩვენი ქვეყნისთვის. უპირველეს ყოვლისა, მე ვიბრძოდი ამერიკისთვის და ყველაფრისთვის, რასაც ის მხარს უჭერს: ეს არის უსაფრთხოება, ძლიერება, სიამაყე და თავისუფლება. მოძრაობა, რომელიც დავიწყეთ, მხოლოდ დასაწყისია. აქამდე მსგავსი არასდროს ყოფილა. იმის რწმენა, რომ ქვეყანა უნდა ემსახუროს თავის მოქალაქეებს, არ გაქრება, არამედ ყოველდღიურად მხოლოდ გაძლიერდება. ვიდრე ამერიკელი ხალხი გულით ატარებს ქვეყნისადმი ღრმა და ერთგულ სიყვარულს, ამ ერისთვის მიუღწეველი არაფერია. გმადლობთ და მშვიდობით. ღმერთმა დაგლოცოთ. ღმერთმა დალოცოს ამერიკის შეერთებული შტატები.“ – თქვა მან თავისი სიტყვის დასასრულს.
შეგახსენებთ, არჩეული პრეზიდენტის, ჯო ბაიდენის ინაუგურაცია ვაშინგტონში დღეს გაიმართება.