ვენაში არსებული ადამიანთა უფლებადამცველი ორგანიზაცია ავრცელებს ინფორმაციას იმასთან დაკავშირებით, რომ ქრისტიანობის მიმართ სიძულვილის მოტივით ჩადენილ დანაშაულთა რიცხვმა ევროპაში 70%-ით იმატა 2019-2020 წლებში. ეს იმ ფონზე, როდესაც ევროპაში შეშფოთებას გამოთქვამენ რელიგიური თავისუფლების მზარდი შეზღუდვის გამო.
ევროპაში ქრისტიანთა მიმართ შეუწყნარებლობისა და დისკრიმინაციაზე დაკვირვების ორგანიზაციის (OIDAC) მიერ გამოქვეყნებული ახალი ანგარიში ყურადღებას ამახვილებს იმაზე, თუ როგორ აისახა რელიგიური თავისუფლების, სინდისის თავისუფლებისა და მშობლების უფლებების თანდათანობით შეზღუდვა ევროპელ ქრისტიანთა უფლებებსა და თავისუფლებაზე.
დოკუმენტში ხაზგასმულია მთავრობის მხრიდან ქრისტიანების მიმართ „მზარდი შეუწყნარებლობა და დისკრიმინაცია“ კანონმდებლობისა და პოლიტიკოსთა გამოსვლების მეშვეობით. გარდა ამისა, ანგარიშში ყურადღება გამახვილებულია ცალკეული პირების მიერ გამოხატულ შეუწყნარებლობაზე, რაც „სოციალურ მიუღებლობასა და დანაშაულებრივ ქმედებებში“ ვლინდება.
ევროპის უსაფრთხოებისა და თანამშრომლობის ორგანიზაციაში შემავალმა დემოკრატიული ინსტიტუტებისა და ადამიანთა უფლებების დამცველმა ოფისმა ნოემბერში გამოაქვეყნა ყოველწლიური ანგარიში, რომელშიც ვკითხულობთ, რომ ქრისტიანობის მიმართ სიძულვილის მოტივით 981 დანაშაული მოხდა ევროპაში 2020 წელს, 2019 წელს კი – 578.
ორგანიზაციის ანგარიში ეყრდნობა ევროპის ხუთ ქვეყანაში – ესპანეთში, საფრანგეთში, გერმანიაში, შვედეთსა და გაერთიანებულ სამეფოში – მოპოვებულ მონაცემებს.
„ეს ქვეყნები შეირჩა იქიდან გამომდინარე, რომ ყველაზე მეტ სირთულეს სწორედ აქ ხვდებიან ქრისტიანები.“ – ნათქვამია ანგარიშში.
გერმანიაში, დანაშაულებრივი ქმედებანი, ძირითადად, პროტესტანტული და კათოლიკური ეკლესიებისადმია მიმართული. ამაში იგულისხმება ვანდალიზმი, საკუთრების დაზიანება, კედლების მოხატვა… ყოფილა ასევე სასულიერო პირებზე თავდასხმისა და შეურაცხყოფის ფაქტებიც. რაც შეეხება გაერთიანებულ სამეფოს, ქრისტიანთა დევნა ყველაზე ხშირად აქ „სიძულვილის ენით“ გამოიხატება.
„შვედეთში არსებობს კანონი, რომელიც კრძალავს რელიგიურ გამონაკლისს (ადამიანის რელიგიური მრწამსის გათვალისწინებას ამა თუ იმ საკითხში), რაც უარყოფით გავლენას ახდენს იქ მცხოვრებ ქრისტიანთა პროფესიულ საქმიანობაზე. შესაძლოა, მალე იგივე კანონი ესპანეთსა და საფრანგეთშიც მიიღონ; რაც, სავარაუდოდ, გამოიწვევს ქრისტიანთა გამორიცხვას ზოგიერთი პროფესიული საქმიანობის სფეროდან.“ – გვაფრთხილებს ორგანიზაცია OIDAC.