ისრაელში განვითრებულ მოვლენებთნ დაკავშირებით, თურქეთის პრეზიდენტ რეჯეფ ტაიპ ერდოღანს პალესტინის ლიდერ მაჰმუდ აბასსა და „ჰამასის“ პოლიტბიუროს ხელმძღვანელ ისმაილ ხანიას შორის სატელეფონო საუბრები შედგა.
ერდოღანმა განაცხადა, რომ ყველაფერს გააკეთებს მთელი მსოფლიოს, განსაკუთრებით კი ისლამური სამყაროს მობილიზებისთვის პალესტინელების წინააღმდეგ ისრაელის ტერორის შესაჩერებლად. მისი თქმით, თურქეთი ყოველთვის დარჩება პალესტინის მომხრედ, იდგება პალესტინელი ძმების გვერდით და დაიცავს იერუსალიმის ღირსებას.
თურქეთის პრეზიდენტი აღნიშნულ საკითხზე იორდანიის მეფე აბდულას და კუვეიტის ემირ შეიხ ნავაფ ალ-აჰმად ალ-საბაჰსაც ესაუბრა. მისი ადმინისტრაციის ინფორმაციით, ერდოღანმა მეფე აბდულას განუცხადა, რომ პალესტინელების წინააღმდეგ განხორციელებული არაადამიანური თავდასხმების სამიზნე ყველა მუსლიმანია და თურქეთმა და იორდანიამ მათ შესაჩერებლად ერთად უნდა იმოქმედონ.
ანკარაში ისრაელის საელჩოს და სტამბულში ისრაელის საკონსულოს შენობებთან ათასობით ადამიანი შეიკრიბა და პალესტინელების მიმართ ისრაელის ქმედებები გააპროტესტა. აქციების მონაწილეებს ხელში პალესტინის დროშები ეჭირათ და სკანდირებდნენ: „თურქი ჯარისკაცები ღაზაში“, „ძირს ისრაელი, ძირს ამერიკა.“
შეგახსენებთ, რომ დაპირისპირება ებრაელებსა და პალესტინელებს შორის თითქმის ერთი კვირაა გრძელდება. დაპირისპირების მიზეზი ისრაელის ხელისუფლების მიერ პალესტინელი ოჯახების გასახლების შესახებ მიღებული გადაწყვეტილებაა. არეულობა იერუსალიმში ისრაელის უზენაესი სასამართლოს მიერ დაგეგმილი სხდომის წინ დაიწყო, რომელზეც შეიხ ჯარას რაიონიდან 70 პალესტინელი ოჯახის გასახლების საკითხი უნდა განხილულიყო, თუმცა ისრაელის გენერალური პროკურორის მოთხოვნით, სხდომა 30 დღით გადაიდო.
ალ-აქსას მეჩეთში, სადაც ათასობით პალესტინელი შეიკრიბა, მათ ისრაელის საწინააღმდეგო ფრაზების სკანდირება დაიწყეს, რასაც ადგილზე მობილიზებულ პოლიციასთან მწვავე დაპირისპირება მოჰყვა. ბოლო 24 საათის განმავლობაში ღაზის სექტორიდან დაჯგუფება „ჰამასმა“ ისრაელის მიმართულებით 200 რაკეტა ისროლა, რასაც ისრაელმა ცეცხლითვე უპასუხა.