არქეოლოგების ცნობით, აღმოსავლეთ თურქეთში მდებარე ტენდიურეკის მთაზე აღმოჩენილია ნავის მსგავსი წარმონაქმნი, რომელიც შეესაბამება ნოეს კიდობნის ბიბლიურ აღწერილობას. ეს წარმონაქმნი გეორადარის დახმარებით აღმოაჩინეს. ასევე მკვლევრების ინფორმაციით, მისი სიგრძე ზუსტად ემთხვევა ბიბლიაში აღწერილი კიდობნის სიგრძეს, 150 მეტრს.
დურუპინარში არსებული ნავის ფორმის ხსენებული წარმონაქმნი პირველად 1959 წელს აღმოაჩინა თურქეთის არმიის კაპიტანმა. მისმა აღმოჩენამ დროებით მიიპყრო მსოფლიოს ინტერესი. 1970-1990 წლებში დურუპინარით დაინტერესებული იყო მკვლევარი როი უაიეტი.
პროექტის „Noah’s Ark Scans“ ვებგვერდზე ვკითხულობთ: „გეორადარის ახალი მონაცემები გვიჩვენებს პარალელურ ხაზებს და კუთხოვან სტრუქტურას, რომელიც მიწის ზედაპირის ქვემოთ 2-დან 6 მეტრამდეა სიღრმეში. მიწის ქვეშ ასეთი პარალელური ხაზების და სწორი კუთხეების მქონე ბუნებრივ გეოლოგიურ წარმონაქმნებს ვერ ნახავთ. საინტერესოა, რომ ნავის ფორმის წარმონაქმნი ზუსტად იმ სიგრძისაა, რა სიგრძისაც იყო ბიბლიური კიდობანი (დაბადება 6:15).“
წელს თურქ მეცნიერთა კონსორციუმი, სხვა დამხმარეებთან ერთად, გეგმავს ხსენებული ადგილის დეტალური გეოფიზიკური კვლევის ჩატარებას და სამეცნიერო შესწავლას ყველა შესაძლო თანამედროვე სამეცნიერო მეთოდის გამოყენებით.