იერუსალიმის მართლმადიდებლური ეკლესიის პატრიარქმა, თეოფილოს III-მ დაგმო იერუსალიმში გეთსიმანიის ეკლესიაში ხანძრის გაჩენის მცდელობა. შემთხვევა გასულ პარასკევს მოხდა.
ისრაელის პოლიციამ დააკავა 49 წლის ებრაელი მამაკაცი, რომელმაც ეკლესიაში ბენზინის გამოყენებით გააჩინა ხანძარი. დაზიანდა ეკლესიაში არსებული ხის სკამები და ბიზანტიური იატაკის მოზაიკა. ცეცხლი დროულად შეამჩნიეს ეკლესიის დარაჯმა და ორმა სხვა მოქალაქემ, რომლებიც ეკლესიასთან ახლოს იყვნენ.
პატრიარქის განცხადებით, ეს იყო რადიკალური იდეოლოგიით შთაგონებული თავდასხმა, რომელიც წმინდა მიწიდან ქრისტიანების განდევნას ისახავს მიზნად.
„მოვუწოდებ საერთაშორისო საზოგადოებას, შეასრულოს თავისი როლი ქრისტიანულ სიწმინდეთა დაცვის საქმეში, რათა შენარჩუნდეს ქრისტიანობა წმინდა მიწაზე.“ – განაცხადა პატრიარქმა.
ხანძრის გაჩენის მცდელობა ასევე დაგმეს იუდეველთა თემის წევრებმა.
„ძალიან ვწუხვართ იერუსალიმში მდებარე ქრისტიანულ ეკლესიაზე თავდასხმის გამო. ებრაელი ერი სოლიდარობას უცხადებს ჩვენს ქრისტიან დებსა და ძმებს ყველგან, სადაც ისინი იდევნებიან რწმენისთვის.“ – განაცხადა ბრიტანეთის კონსერვატიული პარტიის ლიდერმა მაიკლ ჰოვარდმა, რომელიც ასევე ბრიტანეთში არსებული ორგანიზაციის, „ქრისტიანთა და იუდეველთა საბჭოს“ ნდობით აღჭურვილი პირი გახლავთ.
გეთსიმანიის ტაძარი მსოფლიოში ცნობილია სახელწოდებით „ყველა ერის ეკლესია“, იგივე „უფლის აგონიის ბაზილიკა“ (Basilica Agoniae Domini). ეს არის რომაულ-კათოლიკური ტაძარი, რომელიც ზეთისხილის მთაზე, გეთსიმანიის ბაღის ახლოს მდებარეობს. ის აგებულია იმ ადგილზე, სადაც, გადმოცემის თანახმად, იესო ქრისტე ლოცულობდა შეპყრობამდე (მარკოზის სახარება, 14:32-42). ტაძარი მანამდე არსებული ორი ეკლესიის ადგილზეა აგებული. მანამდე აქ იდგა მე-4 საუკუნის ბიზანტიური ბაზილიკა, რომელიც მიწისძვრამ დაანგრია 746 წელს; შემდეგ კი მე-12 საუკუნეში აგებული ჯვაროსანთა ტაძარი, რომელიც 1345 წელს მიატოვეს. დღეს არსებული ეკლესია აიგო 1919-1924 წლებში მსოფლიოს 12 ქვეყნის მიერ გაღებულ შემოწირულობათა ხარჯზე. სწორედ ამიტომ ეწოდება მას „ყველა ერის ეკლესია“ და ამიტომაც აქვს 12 გუმბათი.