ინდონეზიის ხელისუფლების ოფიციალური ვერსიით, ქრისტიანი ხუცესი, იერემია ზანამბანი, მოკლულია ინდონეზიაში უშიშროების ძალებსა და სეპარატისტულ დაჯგუფებებს შორის სასიკვდილო სროლათა სერიების დროს. ამის შესახებ ამერიკული ტელეკომპანია CBN-ი იუწყება.
ხუცესი იერემია ზანამბანი ცნობილია მონის დიალექტზე ბიბლიის თარგმნით, რომელიც პაპუა-ახალი გვინეის ერთ-ერთი დიალექტი გახლავთ.
ინდონეზიის ხელისუფლების განცხადებით, ისინი ატარებენ გამოძიებას და ამტკიცებენ, რომ ხუცესი შეიარაღებული კრიმინალური დაჯგუფების მხრიდან ნასროლ ტყვიას შეეწირა, როდესაც ის ღორებს მწყემსავდა ინტან ჯაიაში, ამ წლის სექტემბერში.
თავად ხუცესის ეკლესიის (the Indonesian Gospel Tabernacle Church) წევრების მტკიცებით, მათ მიიღეს ინფორმაცია, რომ ხუცესი ზანამბანი ინდონეზიის შეიარაღებული ძალების ოფიცრებმა აწამეს და მოკლეს ცეცხლსასროლი იარაღით.
რელიგიური პირების მიმართ ძალადობის შემთხვევების გამოძიების ჰუმანიტარული ჯგუფის ხელმძღვანელმა ჰარის აზჰარმა პრესკონფერენციაზე განაცხადა, რომ ჯარისკაცები განგებ ეძებდნენ ხუცესს, რათა მოეკლათ იგი.
„როგორც ვიცით, მას დანახვისთანავე უბრძანეს ხელების აწევა, რაზეც ხუცესმა იერემიამ აწეული ხელებით უპასუხა, რომ იგი ღვთის მსახური გახლდათ.“ – თქვა აზჰარმა.
ინდონეზიის ეკლესიების გაერთიანებამ უკვე მიმართა ქვეყნის პრეზიდენტს, ჯოკო ვიდოდოს, მოთხოვნით, რომ ყველა დამნაშავემ აგოს პასუხი.
როგორც Antara News იუწყება, რეგიონის უმაღლესმა სამხედრო მეთაურმა განაცხადა, რომ ნებისმიერი ჯარისკაცი, ვისაც დაუმტკიცდება დანაშაულში მონაწილეობა, უმკაცრესად დაისჯება.