გაერთიანებულ სამეფოში არსებული დამოუკიდებელი გლობალური მედიაორგანიზაცია openDemocracy კომპანია „ამაზონისგან“ მოითხოვს, AmazonSmile-ის საქველმოქმედო ვებგვერდის ჩამონათვალიდან ამოშალოს ქრისტიანული ორგანიზაციები, რადგან ისინი ტრადიციულ, ბიბლიურ შეხედულებებს ემხრობიან სექსუალურობასთან დაკავშირებით.
ორგანიზაცია აცხადებს, რომ „ამაზონმა“ ქრისტიანული ორგანიზაციები Focus on the Family, ასევე, „ბილი გრემის ევანგელისტური ასოციაცია“ და სხვა ქრისტიანული ჯგუფები უნდა ამოშალოს AmazonSmile-ის პროგრამიდან, რადგან ისინი ეწინააღმდეგებიან ერთი და იმავე სქესის წარმომადგენელთა შორის ქორწინებას; გარდა ამისა, ადასტურებენ ბიბლიის სწავლებას იმასთან დაკავშირებით, რომ ჰომოსექსუალობა ცოდვაა.
AmazonSmile არის „ამაზონის“ მიერ დაფინანსებული პროგრამა, რომელიც მყიდველებს აძლევს იმის შესაძლებლობას, რომ საკუთარ შენაძენთა ნაწილი ქველმოქმედებას შესწირონ. ორგანიზაცია OpenDemocracy ამ ქრისტიანულ ჯგუფებს „ანტი-ლგბტ“-ს უწოდებს.
„აშშ-ში არსებული ათეულობით ანტი-ლგბტ ჯგუფი ფინანსებს „ამაზონის“ ონლაინშემოწირულობათა პლატფორმის მეშვეობით აგროვებს, მიუხედავად სექსუალურ ორიენტაციაზე დაფუძნებული დისკრიმინაციის წინააღმდეგ მიმართული კომპანიის პოლიტიკისა.“ – წერია ორგანიზაციის ვებგვერდზე.
ორგანიზაცია openDemocracy ასევე წერს, რომ AmazonSmile-ის ვებგვერდზე ჩამოთვლილია 40-ზე მეტი ქრისტიანული ორგანიზაცია, რომელიც ღიად ეწინააღმდეგება ლგბტ უფლებებსა და მათ თანასწორუფლებიანობას. ამ ორგანიზაციებს შორის openDemocracy ასახელებს Focus on the Family-ს, ბილი გრემის ევანგელისტურ ასოციაციას და ასევე, American Center for Law and Justice-ს (კანონისა და მართლმსაჯულების ამერიკული ცენტრი).
აშშ-ში მცხოვრები მილიონობით სახარებისეული მორწმუნე უჭერს მხარს ამ სამ ორგანიზაციას. „ბილი გრემის ევანგელისტური ასოციაციის“ წარმომადგენელმა ცოტა ხნის წინ განაცხადა: „ჩვენ არ ვერთვებით კანონსაწინააღმდეგო დისკრიმინაციაში და არც შეუწყნარებლობას ვუჭერთ მხარს. ვიმედოვნებთ, რომ Amazon Smile გააგრძელებს ყველა ადამიანის უფლებებისა და ღირსების პატივისცემას და არ გამოიჩენს დისკრიმინაციას რელიგიური ჯგუფების მიმართ, რომლებიც მხოლოდ და მხოლოდ საკუთარ გულწრფელ, რელიგიურ შეხედულებებზეა დაფუძნებული.“