მოზამბიკში ისლამური სახელმწიფოს ტერორისტების მიერ 30-ზე მეტ ქრისტიანს თავი მოჰკვეთეს — ამის შესახებ უცხოური წყაროები იუწყებიან.
ისლამური სახელმწიფოს მოზამბიკის პროვინციამ (ISMP) განაცხადა, რომ მათ გაანადგურეს, სულ მცირე, შვიდი ეკლესია, ცეცხლი წაუკიდეს ქრისტიანთა და ადგილობრივ მცხოვრებთა სახლებს და ტყვიით მოკლეს ან თავი მოჰკვეთეს ათეულობით ადამიანს ქვეყნის ჩრდილოეთ პროვინციებში — კაბო დელგადოსა და ნამპულაში.
ორგანიზაცია MEMRI-მ (The Middle East Media Research Institute) ტერორისტების ანგარიშის თარგმანი და შესაბამისი ფოტოები გამოაქვეყნა, სადაც ასახულია ქრისტიანთა მიმართ განხორციელებული სისასტიკე.
მოზამბიკის ისლამური სახელმწიფო ამ რეგიონში შიშითა და ძალადობითაა მართული. ჯგუფმა ასევე იკისრა პასუხისმგებლობა 25 სექტემბერს ორი მორწმუნის თავი მოკვეთის ფაქტზე, ასევე, 26 სექტემბერს განხორციელებულ თავდასხმაზე, სადაც ერთი ადგილობრივი ქრისტიანი მოკლეს. რამდენიმე დღეში მაკომიას ქალაქში ოთხ ქრისტიანს კვლავ თავი მოჰკვეთეს. ჯგუფმა ასევე გამოაქვეყნა ფოტოები, სადაც ჩანს დამწვარი ეკლესიები და საცხოვრებელი სახლები ნაკოჩაში, ნაკუსაში, მინჰანასა და ნაკიოტოში.
ადგილობრივ სოფლებში თავდასხმების საპასუხოდ, მოზამბიკის ხელისუფლებამ აგვისტოს ბოლოს კვლავ განაახლა სამხედრო კავშირი რუანდასთან. შეთანხმების საფუძველზე, რუანდის თავდაცვის ძალები დათანხმდნენ კაბო დელგადოში ჯარების გაგზავნაზე.
როგორც CBN News იტყობინება, ძალადობრივი თავდასხმები კაბო დელგადოში 2017 წლიდან დაიწყო. მას შემდეგ 6,000-ზე მეტი ადამიანი იქნა მოკლული, ათასობით მათგანი კი გადასახლდა საკუთარი რეგიონიდან.
ორგანიზაცია Open Doors-ის „მსოფლიო დევნის სია 2025“-ის მიხედვით, მოზამბიკი 37-ე ადგილზეა იმ ქვეყნებს შორის, სადაც ქრისტიანებისთვის ცხოვრება ყველაზე რთულია. პროვინცია კაბო დელგადო ერთადერთი რეგიონია ქვეყანაში, სადაც მუსლიმანური მოსახლეობა უმრავლესობას წარმოადგენს, მაშინ როცა მთლიანად ქვეყანა უმეტესად ქრისტიანულია — მათ შორის დიდი ნაწილი ევანგელისტი და ე. წ. ორმოცდაათიანელი ქრისტიანები არიან, როგორც აღნიშნულია აშშ-ის სახელმწიფო დეპარტამენტის ანგარიშში.