27 ნოემბერს ინდონეზიის ცენტრალურ პროვინციაში, სულავესში, ტერორისტულმა დაჯგუფებამ, სახელად „აღმოსავლეთ ინდონეზიის მოჯაჰიდები“ (MIT), ქრისტიანების რამდენიმე სახლი გადაწვა, ხოლო ოთხი ქრისტიანი მოკლა.
ქვეყნის უშიშროების მინისტრისა და ადგილობრივი პოლიციის განყოფილების უფროსის თქმით, მკვლელობა სწორედ ამ ორგანიზაციის 8 წევრმა ჩაიდინა ორგანიზაციის ლიდერის, ალი კალიორას მეთაურობით. როგორც საინფორმაციო სააგენტო AsiaNews.it იუწყება, ამ ორგანიზაციას კავშირი აქვს ისლამურ სახელმწიფოსთან.
დაკრძალვა ტრაგედიიდან ორ დღეში, 29 ნოემბერს გაიმართა. უშიშროების მინისტრის თქმით, ტერორისტებს არ დაუწვავთ ეკლესიები, თუმცა, როგორც საინფორმაციო სააგენტო იუწყება, ტერორისტების მიერ გადამწვარი ზოგიერთი სახლი ღვთისმსახურების ჩასატარებლად გამოიყენებოდა ერთ-ერთი პროტესტანტული ეკლესიის, „ხსნის არმიის“ მიერ. დახოცილებიც სწორედ „ხსნის არმიის“ ეკლესიის წევრები იყვნენ.
ბევრმა ქრისტიანულმა და არაქრისტიანულმა თემმა მიუსამძიმრა „ხსნის არმიის“ ეკლესიას. მათ ცენტრალური სულავესის მოსახლეობას მსხვერპლთა ოჯახებისთვის ლოცვისკენ მოუწოდეს. როგორც იუწყებიან, თავად ინდონეზიის პრეზიდენტი ჯოკო ვიდოდო დუმს. მოსახლეობის ნაწილი გაოცებულია ამ დუმილით, რადგან ახსოვთ, რომ ვიდოდომ მწუხარება გამოთქვა საფრანგეთის ქალაქ ნიცაში მომხდარი ტერორისტული აქტის გამო. მეორე ნაწილი კი ამტკიცებს, რომ პრეზიდენტი უბრალოდ თავს იკავებს საჯარო განცხადებებისგან.
ადგილობრივი ხელისუფლების თქმით, პროვინციაში მობილიზებულნი არიან პოლიციელები, რომლებსაც ტერორისტების ძიებაში სამხედროებიც შეუერთდნენ. თუმცა როგორც საინფორმაციო სააგენტო „როიტერსი“ ვარაუდობს, სამძებრო სამუშაოები რთული იქნება, რადგან სოფელი, სადაც ტერორისტების ძიება მიმდინარეობს, საკმაოდ მთიანია.
როგორც ცნობილია, უკვე ათეული წელია, რაც ინდონეზიის კუნძულ სულავესის ცენტრალური ნაწილი ტერორისტული თავდასხმების ველს წარმოადგენს.
P.S. გთხოვთ ილოცოთ ქრისტიანებისთვის, რომელთაც ისლამურ გარემოში უწევთ ცხოვრება და ბრძოლა თავის გასატანად.