ნეფილიმების, გიგანტური ადამიანების, შესახებ დოკუმენტურ სერიალს იღებენ

ახალი დოკუმენტური სერიალი შეეხება გიგანტურ არსებებს, ნეფილიმებს, რომელთა არსებობის შესახებ ბიბლიაშიც ვკითხულობთ, კერძოდ, დაბადების მე-6 თავში.

ფილმი, სახელწოდებით „ანგელოზები & გიგანტები, წმინდა გუშაგები & ნეფილიმები“ წარმოდგენილი იქნება 4 სერიად, თითო სერიის ხანგრძლივობა 1 საათს შეადგენს.

ფილმის პროდიუსერის, რუდი ლანდას თქმით, მართალია ეს ფილმი ბიბლიურ ისტორიებს მოიცავს, თუმცა ის ნებისმიერი მაყურებლისთვის იქნება საინტერესო.

„ბიბლიაში ბუმბერაზები რამდენიმე ადგილას არიან ნახსენებნი, ერთ-ერთია დაბადების წიგნის მე-6 თავი. ნეფილიმები იყვნენ ზეციური არსებების შთამომავლები, რომლებიც თვალყურს ადევნებდნენ დედამიწას. ჩვენ მხოლოდ რწმენაზე დაფუძნებულ ამბავს არ ვყვებით, ამასთან დაკავშირებით ძალიან ბევრი მტკიცებულება არსებობს არა მხოლოდ ბიბლიაში, არამედ არქეოლოგიურ კვლევებშიც.“ – ამბობს ის.

ბიბლიაში, დაბადების წიგნის მეექვსე თავში, ვიდრე წარღვნის ისტორია დაიწყება, ნახსენებია „ღმერთის შვილი“: „იხილეს ღმერთის შვილებმა, რომ მშვენიერნი იყვნენ ადამიანთა ასულები და ვისაც ვინ მოეწონებოდა, ცოლად ირთავდა“. სწორედ მათ შთამომავლებს ეწოდებოდათ ნეფილიმები, გიგანტთა რასა, რომლებიც დედამიწაზე ცხოვრობდნენ.

გამოკვლევები ნეფილიმების შესახებ ისრაელიდან დაიწყო, მას შემდეგ კი გაგრძელდა ეგვიპტეში, პერუსა და ამერიკის შეერთებულ შტატებში. სერიალის პირველი ეპიზოდიც გოლანის მაღლობებიდან, ისრაელიდან დაიწყება.

ენოქის წიგნში, რომელიც ერთ-ერთი აპოკრიფული წიგნია, ვკითხულობთ ნეფილიმებზე, რომლებიც გამოძევებულნი იყვნენ ზეციდან და დასახლდნენ ხერმონის მთაზე, რომელიც ებრაული სიტყვიდან cherem მოდის და ნიშნავს „განდევნილად ყოფნას“. სწორედ ამ ადგილიდან, ბაშანიდან იყო ყოგი (ბიბლია, მეორე რჯული 3:11), მეფე, რომელიც ისრაელიანების წინააღმდეგ გამოვიდა აღთქმულ მიწაზე შესვლის პერიოდში.

სერიალის გამოშვება ამ წელს იგეგმება.