საერთაშორისო, ქრისტიანული საქველმოქმედო ორგანიზაცია „სამარიტელის ქისა“ საველე ჰოსპიტალს, იტალიისა და ნიუ-იორკის შემდეგ, ბაჰამის კუნძულებზეც ხსნის. ამის შესახებ ორგანიზაციამ გასულ ხუთშაბათს, 15 ოქტომბერს განაცხადა. გადაწყვეტილება მას შემდეგ მიიღეს, რაც ბაჰამის კუნძულებზე კოვიდ-19-ით ინფიცირებულთა რაოდენობის სწრაფმა ზრდამ ადგილობრივი სამედიცინო სისტემის სერიოზული გადატვირთვა გამოიწვია.
თავდაპირველად, ქრისტიანული საქველმოქმედო ორგანიზაციის კარვები იტალიის ქალაქ კრემონაში დაიდგა, შემდგომ – ნიუ-იორკში, ახლა კი ბაჰამის კუნძულების დედაქალაქ ნასაუში იხსნება.
ორგანიზაცია გეგმავს 28-საწოლიანი საველე ჰოსპიტლის გახსნას და ექიმებისა და მედდების გუნდის გაგზავნას ნასაუში. ინფექციურ დაავადებებთან საბრძოლველად გადამზადებული სამედიცინო პერსონალი ბაჰამის კუნძულების ჯანდაცვის სამინისტროსთან და ასევე, პრინცესა მარგარეტის სახელობის ადგილობრივ ჰოსპიტალთან ითანამშრომლებს.
15 ოქტომბერს მათ თვითმფრინავით უკვე გადაზიდეს პირველადი მოხმარების ყველაზე საჭირო საგნები და თავად ექიმებიც ჩაიყვანეს.
როგორც „სამარიტელის ქისის“ ხელმძღვანელობამ განაცხადა, ბაჰამის კუნძულების პრემიერ-მინისტრმა დახმარება მათ მას შემდეგ სთხოვა, რაც ადგილობრივი სამედიცინო დაწესებულებები ინფიცირებულებით გადაივსო.
„ჩვენი გუნდი ორიენტირებულია, დახმარება აღმოუჩინოს ყველაზე რთულ მდგომარეობაში მყოფთ, იესო ქრისტეს სახელის განსადიდებლად. ეს გახლავთ შესაფერისი დრო და ადგილი იმისათვის, რათა შევძლოთ დაშავებულ ადამიანთა ცხოვრების სასიკეთოდ შეცვლა.“ – განაცხადა ორგანიზაციის ხელმძღვანელმა ფრანკლინ გრემმა.
შეგახსენებთ, რომ „სამარიტელის ქისამ“ წინა წელსაც აღმოუჩინა დახმარება ბაჰამის კუნძულებს. ქარიშხალ „დორიანის“ დასრულების შემდეგ ორგანიზაციამ 40-საწოლიანი საველე ჰოსპიტალი ერთ-ერთ კუნძულ დიდ ბაჰამაზე გაშალა. მან ასევე გახსნა სამხარეო ოფისი, რათა დაეკმაყოფილებინა ქარიშხლისგან დაზარალებულთა საჭიროება დასალევ წყალსა და დანგრეულ სახლთა აღდგენასთან დაკავშირებით.