რუსეთის ეკლესიების ასობით წინამძღვარი პროტესტს გამოთქვამს რუსეთის არმიის უკრაინაში შეჭრის გამო. რუსეთში არსებული ევანგელისტური ეკლესიების ათობით წინამძღვარმა ხელი მოაწერა წერილს, რომელშიც ისინი გმობენ „უაზრო სისხლისღვრას“.
წერილში ვკითხულობთ: „ვერავითარი პოლიტიკური ინტერესი ან მიზანი ვერ ამართლებს უდანაშაულო ადამიანთა დახოცვას. მოხუცები, ქალები, ბავშვები იხოცებიან. ორივე მხარეს მებრძოლი ჯარისკაცები იხოცებიან. ქალაქები და მათი ინფრასტრუქტურა ნადგურდება. გარდა სამხედრო სამიზნეებისა, აფეთქებენ საავადმყოფოებს, საცხოვრებელ სახლებს. უამრავი ადამიანი დევნილად იქცა. საომარი ზონები ჰუმანიტარული კატასტროფის წინაშე დგას.
გარდა სისხლისღვრისა, სუვერენულ უკრაინაში შეჭრა ხელყოფს მის მოქალაქეთა თავისუფლებას. სიძულვილი ითესება ჩვენს ხალხებს შორის, რაც კიდევ უფრო გააღრმავებს გაუცხოებისა და მტრობის უფსკრულს მომავალ თაობებში. ომი ანადგურებს არა მხოლოდ უკრაინას, არამედ რუსეთს: მის ხალხს, მის ეკონომიკასა და მომავალს.“
სერგეი რახუბა, ორგანიზაცია „მისია ევრაზიის“ პრეზიდენტი, აცხადებს, რომ ეს ძალიან გაბედული ნაბიჯია რუსეთის ეკლესიების წინამძღვრებისაგან.
„რუსეთის საერო საზოგადოებაშიც და, სამწუხაროდ, ეკლესიაში აზრთა ძალიან დიდი სხვადასხვაობაა. ზოგი უბრალოდ გაჩუმებას ამჯობინებს, რადგან დღეს ხმის ამოღება სახიფათოა“, – ამბობს ის.
ამას გარდა, რუსეთის მართლმადიდებლური ეკლესიის 270-ზე მეტი მღვდელი და დიაკვანი ხელს აწერს ერთობლივ თხოვნას შერიგებისა და ომის დაუყოვნებელი შეწყვეტის შესახებ. წერილში ხაზგასმულია მონანიებისა და ცხონების აუცილებლობა:
„ჩვენ ვგლოვობთ იმის გამო, რომ ჩვენი უკრაინელი დები და ძმები დაუმსახურებელ განსაცდელში არიან. შეგახსენებთ, რომ თითოეული ადამიანის სიცოცხლე ღვთისგან ბოძებული ფასდაუდებელი საჩუქარია და ამიტომაც, ჩვენ გვსურს, რომ ყველა ჯარისკაცი − რუსიც და უკრაინელიც − ცოცხალი და საღ-სალამათი დაუბრუნდეს საკუთარ ოჯახს. ჩვენ დამწუხრებულნი ვფიქრობთ რუსეთსა და უკრაინას შორის არსებული იმ უფსკრულის შესახებ, რომლის გადალახვაც მოუწევთ ჩვენს შვილებსა და შვილიშვილებს, რათა ისევ შეძლონ ერთმანეთთან მეგობრული ურთიერთობის აღდგენა, ისევ შეძლონ ერთმანეთის პატივისცემა და სიყვარული. ჩვენ ვაფასებთ ადამიანისთვის ღვთის მიერ მინიჭებულ თავისუფლებას და გვჯერა, რომ უკრაინელმა ხალხმა თავად უნდა აირჩიოს ის, რაც სურს.“