რუსეთის ევანგელური ალიანსის გენერალურმა მდივანმა, ვიტალი ვლასენკომ 12 მარტს ღია წერილი გაავრცელა, რომელშიც მწუხარებას გამოთქვამს უკრაინაში რუსეთის შეჭრის გამო.
„მე ვგლოვობ იმის გამო, რაც ჩემმა ქვეყანამ გააკეთა. ის შეიჭრა მეორე სუვერენულ ქვეყანაში.“ – ვკითხულობთ წერილში.
მიუხედავად იმისა, რომ წერილის ენა საკმაოდ ფრთხილია, უნდა აღინიშნოს, რომ ავტორი პირდაპირ და ობიექტურად აფასებს მომხდარს:
„ჩემთვის, ისევე, როგორც ბევრი სხვა ქრისტიანისთვის, სამხედრო ძალების შეჭრა შოკის მომგვრელი იყო. ყველაზე ცუდ შემთხვევაშიც კი ვერ წარმოვიდგენდი იმას, რაც ახლა ხდება უკრაინაში. ჩემი ქვეყნის ხელმძღვანელობის მიერ მიღებული გადაწყვეტილებები ჩემში დიდ მწუხარებას და სინანულს იწვევს. დღეს, როგორც რუსეთის მოქალაქე და როგორც რუსეთის ევანგელური ალიანსის გენერალური მდივანი, ბოდიშს ვუხდი ყველას, ვინც იტანჯება, ვინც ახლობლები და ნათესავები ან საცხოვრებელი ადგილი დაკარგა ამ სამხედრო კონფლიქტის შედეგად. ვლოცულობ, რომ უფალში იპოვოთ ძალა, რათა შეძლოთ პატიება და რათა ვიცხოვროთ, როგორც ღვთის ერმა.“
შეგახსენებთ, რომ რუსეთმა უკრაინაზე სრულმასშტაბიანი თავდასხმა 24 თებერვალს, გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმერ პუტინმა უკრაინას ომი ვიდეომიმართვით ოფიციალურად გამოუცხადა. პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ „უკრაინული აგრესიის“ მოგერიებაში.