უკრაინელი ქრისტიანები მსოფლიოს ლოცვისკენ მოუწოდებენ

უკრაინაში არსებული ქრისტიანული მსახურებები მთელ ქვეყანაში მცხოვრებ მორწმუნეებს მოუწოდებენ იმისკენ, რომ უშიშრად იდგნენ. მათი თქმით, ქრისტიანების მისია უცვლელია მაშინაც კი, როცა რუსეთის არმია განაგრძობს მათ მიწაზე თავდასხმას.

„გაიხსენეთ, რამდენჯერ გვეუბნება ღმერთი თავის სიტყვაში: ‘ნუ გეშინია’“, – დაწერა თავისი „ფეისბუკის“ გვერდზე კიევის თეოლოგიურმა სემინარიამ. სტატუსში ციტირებული იყო ესაია წინასწარმეტყველის 46:10:  

„ნუ გეშინია, რადგან მე შენთან ვარ; ნუ ფრთხი, რადგან შენი ღმერთი ვარ მე. გაგამაგრებ და შეგეწევი და მხარს დაგიჭერ ჩემი სიმართლის მარჯვენით.“

უკრაინა ერთ-ერთი ყველაზე ქრისტიანული ქვეყანაა ევროპის ქვეყნებს შორის. მოსახლეობის 78% უკრაინის მართლმადიდებლურ ეკლესიას მიეკუთვნება, 10% – რომაულ-კათოლიკურ ეკლესიას და 2% – ევანგელისტებს.

სემინარია თავის სტუდენტებს მოუწოდებს მეტროსადგურებში თავშეფარებული მოქალაქეების დახმარებისკენ.

ვალერი ანტონიუკი, უკრაინის ბაპტისტური გაერთიანების პრეზიდენტი, ავრცელებს ვიდეომიმართვას, სადაც ის 22-ე ფსალმუნს კითხულობს და მსოფლიოს ლოცვისკენ მოუწოდებს. „ლოცვა ჩვენი იარაღია ომის დროს“, – ამბობს ის.

ქრისტიანული რადიო (New Life Christian Radio), რომლის სადგურიც ოდესაში მდებარეობს, აცხადებს, რომ არ შეწყვეტს ქრისტესა და მისი სახარების შესახებ ქადაგებას, რადგან როგორც უკრაინის, ასევე რუსეთის მოსახლეობას სჭირდება მხსნელის შესახებ მოსმენა, რომელიც მსოფლიოში მიმდინარე ყველა პროცესს აკონტროლებს.

ორგანიზაცია Open Doors-ის ინფორმაციით, უკრაინელ ქრისტიანებს „არ დავიწყებიათ დევნა, რომელსაც განიცდიდნენ საბჭოთა კავშირის დროს და მტკიცედ აქვთ განზრახული, გააგრძელონ სახარების ქადაგება“.

კიევის თეოლოგიურმა სემინარიამ სამი ლოცვითი სათხოვარი დაასახელა:

1. ილოცეთ უკრაინისთვის;
2. ილოცეთ უკრაინის შეიარაღებული ძალებისთვის;
3. ილოცეთ იმისათვის, რომ მტერმა შეწყვიტოს დანაშაულთა ჩადენა და დამარცხდეს. ილოცეთ, რათა უკრაინის ეკლესია კვლავ ემსახუროს საზოგადოებას.