უკრაინის მეზობელ ქვეყნებში ეკლესიებმა კარი გახსნეს ლტოლვილების დასახმარებლად.
ლტოლვილების საკითხში გაეროს უზენაესმა კომისარმა, ფილიპო გრანდიმ გაავრცელა ინფორმაცია, რომ 1,5 მილიონზე მეტმა ადამიანმა დატოვა უკრაინა რუსეთის შეჭრის შემდეგ. ლტოლვილების უმეტესობა პოლონეთში, მოლდოვაში, სლოვაკეთსა და უნგრეთში გადავიდა.
არსებული სიტუაციის გათვალისწინებით, აღნიშნულ ქვეყნებში ევანგელისტურმა ეკლესიებმა სწრაფად გარდაქმნეს თავიანთი ეკლესიები თუ საბანაკე ტერიტორიები ლტოლვილთა თავშესაფრებად. „ევროპის ბაპტისტური ფედერაციის“ თანახმად, მათმა ეკლესიებმა ყველანაირი ავეჯი თუ ინვენტარი საწოლებით ჩაანაცვლეს.
„ამბიონზე, აივანსა და ყველა ხელმისაწვდომ ადგილზე საწოლები დგას, სამზარეულოში კი ცხელი წვნიანი მზადდება დევნილებისთვის.“ – ნათქვამია „ევროპის ბაპტისტური ფედერაციის“ განცხადებაში.
სამხრეთ ბაპტისტური კონვენციის საერთაშორისო მისიის საბჭოს თანახმად, პოლონელმა ბაპტისტებმა ამ დროისთვის 40 თავშესაფარი შექმნეს ლტოლვილებისთვის.
საზღვართან დევნილებს ხვდებიან მოლდავეთის ევანგელისტური ეკლესიების წევრებიც. მათ თან მიაქვთ პირველადი ნივთები, თბილი პლედები და ცხელი ჩაი უკრაინელი ლტოლვილებისთვის. შემდგომ კი სტუმრებს ეკლესიებსა და მორწმუნეთა ოჯახებში ინაწილებენ.
UMC ეკლესიებმა უნგრეთში, სლოვაკეთსა და პოლონეთში ასევე უზრუნველყვეს ლტოლვილების თავშესაფარი. რუმინეთში მეთოდისტები აძლევენ თავშესაფარს ლტოლვილებს სასტუმროს შენობაში, რომელიც საზოგადოებრივ ცენტრად გადააქციეს.
შეგახსენებთ, რომ რუსეთმა უკრაინაზე სრულმასშტაბიანი თავდასხმა 24 თებერვალს, გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო. ქალაქების დაბომბვამდე სულ რაღაც 20 წუთით ადრე რუსეთის პრეზიდენტმა, ვლადიმერ პუტინმა უკრაინას ომი ვიდეომიმართვით ოფიციალურად გამოუცხადა.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ „უკრაინული აგრესიის“ მოგერიებაში.