ოჰაიოს შტატის ქალაქ ბეი ვილიჯში, მამაკაცმა პოლიციას დაურეკა და პარკის სკამზე მძინარე უსახლკარო ადამიანის შესახებ შეატყობინა. პარკში მისულმა პოლიციელებმა ნახეს, რომ ეს უსახლკარო ადამიანი კი არა, სკამზე მძინარე იესო ქრისტეს ქანდაკება იყო, რომელიც ცნობილია სახელწოდებით – „უსახლკარო იესო“. პოლიციამ მალევე გაარკვია საქმის ვითარება, ადგილობრივი ეკლესიის მრევლისათვის კი ეს შემთხვევა მრავლისმთქმელი აღმოჩნდა.
აღნიშნული ქანდაკება ოჰაიოში, კლივლენდის წმ. ბარნაბას ეპისკოპალური ეკლესიის გვერდით ახლახან დაამონტაჟეს. ეს ქანდაკება ეკუთვნის ორგანიზაციას Community West Foundation, რომელიც ზრუნავს უსახლკარო ადამიანებზე. ქანდაკება კლივლენდში პირველ დეკემბრამდე დარჩება. იგი მიზნად ისახავს საზოგადოების ცნობიერების ამაღლებას უსახლკაროთა მიმართ დამოკიდებულების მხრივ.
ეკლესიის ღვთისმსახური, ალექს მარტინი ამბობს: „ქანდაკება შეგვახსენებს იმას, რომ შორს წასვლა არ გვჭირდება გასაჭირში მყოფ ადამიანთა აღმოსაჩენად. იქნებ ეს ქანდაკება გახდეს შთაგონება მათთვის, ვისაც სურს გაჭირვებულთა დახმარება. ქრისტეს ამგვარად გამოქანდაკება ჩვენთვის შეხსენებაა იმისა, რომ ის საკუთარ თავს საზოგადოების მიერ გარიყულ ადამიანებთან აიგივებდა.“
„მოხარულნი ვართ, რომ დროებით ვმასპინძლობთ ‘უსახლკარო იესოს’ ამ ქანდაკებას კლივლენდში, რომელიც შეგვახსენებს, რომ ყველა ადამიანი ღვთის ხატად არის შექმნილი.“ – ვკითხულობთ ეკლესიის Twitter-ზე.
შეგახსენებთ, რომ „უსახლკარო იესო“ გახლავთ ბრინჯაოს ქანდაკება, რომელიც კანადელ მოქანდაკეს, ტიმოთე შმალტსს ეკუთვნის. ქანდაკება გამოსახავს პარკის სკამზე მძინარე იესოს, როგორც უსახლკარო ადამიანს. თავდაპირველი ქანდაკება დადგეს ტორონტოს უნივერსიტეტის რეგის კოლეჯში 2013 წელს. იმავე ქანდაკების ასლები კი მსოფლიოს სხვადასხვა კუთხეში დაიდგა მას შემდეგ.
ზემოთ აღნიშნული ქანდაკების გამოფენა კი რამდენიმე ეკლესიაში იგეგმება იმავე აქციის ფარგლებში.