ფინეთის ყოფილი შინაგან საქმეთა მინისტრი, პაივი რაზანენი, ორშაბათს სასამართლოზე წარდგა სექსუალურ უმცირესობათა მიმართ სიძულვილის ენის გამოყენების ბრალდებით. მას ორი წლით თავისუფლების აღკვეთა ემუქრება.
საქმე 2019 წელს აღიძრა, როცა რაზანენმა სოციალურ მედიაში გამოაქვეყნა ბიბლიის ის მონაკვეთი, რომელიც გმობს ჰომოსექსუალიზმს. ბრალდება სამ შემთხვევას ეფუძნება: ინტერნეტში გამოქვეყნებულ სტატიას, რადიოინტერვიუსა და სოციალურ ქსელში გამოქვეყნებულ ბიბლიურ მონაკვეთს.
„ტვიტერზე“ გამოქვეყნებულ პოსტში ის კითხვას უსვამს ფინეთის ლუთერანულ ეკლესიას, რომელიც ოფიციალურად უჭერდა მხარს ფინეთში გეიპრაიდის ჩატარებას.
2004 წელს გამოქვეყნებულ სტატიაში ის წერს, რომ ჰომოსექსუალიზმი ფსიქოსექსუალური განვითარების დარღვევაა.
პაივი რაზანენი უარყოფს ბრალდებას და იცავს საკუთარ პოზიციას. მისი თქმით, პოსტი გამოწვევა იყო ევანგელურ-ლუთერანული ეკლესიების გაერთიანებისადმი ჰელსინკის გეიპრაიდთან დაკავშირებით და არა ჰომოსექსუალური ცხოვრების მიმდევარი ადამიანების კრიტიკა.
„უარვყოფ რაიმე არასწორ ქმედებას. ჩემი განცხადებები, რომლებსაც ახლა იძიებენ, დაკავშირებულია ქორწინების, ქალად და მამაკაცად ცხოვრების შესახებ ბიბლიურ სწავლებასთან; ასევე, ჰომოსექსუალიზმის შესახებ მოციქულ პავლეს სწავლებასთან. ქორწინებასა და სექსუალურობასთან დაკავშირებული ბიბლიური სწავლებანი ნაკარნახებია მოყვასისადმი სიყვარულით და არა ადამიანთა რომელიმე ჯგუფის მიმართ სიძულვილით.“ – აცხადებს რაზანენი.
სასამართლომ უნდა გადაწყვიტოს, ფინეთში ბიბლიის ციტირება დანაშაულად უნდა ჩაითვალოს თუ არა ზოგიერთ შემთხვევაში. გადაწყვეტილება ერთ თვეში გახდება ცნობილი. რაზანენის აზრით, სასამართლოს გადაწყვეტილება უაღრესად დიდ გავლენას მოახდენს ქვეყანაში მცხოვრებ ყველა მორწმუნე ქრისტიანზე.