სირიაში, იდლიბის პროვინციის სოფელ კნაიესა და იაკუბიაში, ქრისტიანები დღემდე ცხოვრობენ სიკვდილის, წამებისა და თავდასხმის ყოველდღიურ საფრთხეში. ამის შესახებ ორგანიზაცია Aid To The Church In Need (ACN) იუწყება.
იდლიბის პროვინცია დასავლეთ სირიაში თურქეთის საზღვართან ახლოს მდებარეობს და დღემდე ჯიჰადისტური დაჯგუფებების მიერ კონტროლდება. ACN-ის მიხედვით, აქ ისევ ისლამური მმართველობა მეფობს. ძალაშია შარიათი (ისლამური რელიგიური კანონები). ყველა ქალისთვის სავალდებულოა ჩადრის ტარება. ქრისტიანულ სიმბოლოებს კი, როგორიცაა, მაგალითად, ჯვარი, ხსნიან და ქრისტიანების ქონების კონფისკაციას ახდენენ.
ადგილობრივ მცხოვრებთა შორის, რომლებიც მიუხედავად საშინელი ვითარებისა, იქ დარჩნენ, სხვადასხვა კონფესიისა და ეთნიკური ჯგუფის 300-მდე ქრისტიანული ოჯახია. სამოქალაქო ომის დაწყებამდე სირიაში ქრისტიანთა რაოდენობა დაახლოებით ორ მილიონ მცხოვრებზე მეტს შეადგენდა.
ისინი მრავალ პრობლემას აწყდებიან: დევნას, ძალადობას, სხვადასხვა საფრთხეს და სიკვდილსაც კი, და იძულებულნი არიან, დამალონ თავიანთი რწმენა და არ გამოხატონ საკუთარი აზრი.
შეგახსენებთ, რომ ქრისტიანების ტანჯვა იდლიბში თითქმის ათწლეულის წინ დაიწყო, როდესაც 2011 წელს ქვეყანაში სამოქალაქო ომი გაჩაღდა. აღნიშნული ომის შედეგად სამხედრო დაჯგუფებებმა დაიპყრეს რეგიონი და იგი ისლამურ სახელმწიფოდ გამოაცხადეს.
P.S. გთხოვთ ილოცოთ ქრისტიანებისთვის, რომელთაც ისლამურ გარემოში უწევთ ცხოვრება და ხშირად ფიზიკური გადარჩენისათვის ბრძოლაც.