ჩინეთის კომუნისტური ხელისუფლება შეშფოთებულია იმ პერსპექტივით, რომ 2030 წლისათვის ჩინეთის ქრისტიანული მოსახლეობა 300 მილიონს მიაღწევს. ორგანიზაცია Open Doors-ის წარმომადგენლის, რონ ბოიდ-მაკმილანის ინფორმაციით, ჩინეთის მთავრობა შიშობს, რომ იძულებული გახდება, „ძალაუფლება გაუყოს“ ეკლესიას, რომლის რიცხობრიობა და გავლენა სულ უფრო და უფრო იზრდება.
ქრისტიანული ორგანიზაცია Open Doors-ის სტრატეგიული კვლევის დირექტორმა რონ ბოიდ-მაკმილანმა Express UK-ის განუცხადა, რომ ჩინეთის კომუნისტური პარტია შეშფოთებულია ქრისტიანული მოსახლეობის ზრდით და ამის გამო უფრო და უფრო ამკაცრებს რელიგიის მიმართ დამოკიდებულებას.
„ვფიქრობთ, რომ მიზეზი, რის გამოც ჩინეთის ქრისტიანულ ეკლესიას ასე ესხმიან თავს, ისაა, რომ ქვეყნის ხელმძღვანელებს ეკლესიის ზომისა და მისი ზრდის ეშინიათ. იმ შემთხვევაში, თუ ჩინეთის ეკლესია ისეთივე ტემპით განაგრძობს ზრდას, როგორც 1980-იანი წლებიდან იზრდება (წელიწადში 7-8%-ით), 2030 წლისათვის ქრისტიანთა რაოდენობა 300 მილიონს მიაღწევს.“ – ამბობს ბოიდ-მაკმილანი.
იგი ასევე აცხადებს: „ჩინეთის ხელისუფლება გრძელვადიან გეგმებს ადგენს, მაგალითად, მათი ეკონომიკური გეგმა 2049 წლამდე ვრცელდება. სწორედ ამიტომ, ეს აშფოთებს მათ, რადგან თუ ეკლესია ასე განაგრძობს ზრდას, ხელისუფლებას მოუწევს ძალაუფლების გაყოფა.“
Open Doors-ის მიხედვით, ჩინეთი მე-17 ადგილზეა მსოფლიოს იმ ქვეყნებს შორის, სადაც ქრისტიანები ყველაზე მეტად იდევნებიან.
ჩინეთის ხელისუფლება მაღალტექნოლოგიურ სათვალთვალო საშუალებებს იყენებს ეკლესიების გასაკონტროლებლად. ბევრ ეკლესიას ხურავენ კიდეც. ქვეყნის ხელისუფლებამ ასევე აკრძალა ბიბლიების ონლაინგაყიდვა.