ჩინეთმა აკრძალა „ქრისტეს“ და ქრისტიანობასთან დაკავშირებული სხვა რელიგიური ტერმინების სოციალურ მედიაში გამოყენება. ახალი დადგენილება ძალაში 1-ელ მარტს შევიდა.
ჩინეთის კომუნისტური პარტიის ახალი კანონი, სახელწოდებით „ზომები ინტერნეტში რელიგიური ინფორმაციის განთავსების ადმინისტრირებისთვის”, უკრძალავს ფიზიკურ პირებს, ასევე ორგანიზაციებს რელიგიური ინფორმაციის განთავსებას ინტერნეტში, თუ ისინი არ მიიღებენ ნებართვას პროვინციული მთავრობის დეპარტამენტისგან. ორგანიზაცია China Aid-ის თქმით, ახალი კანონი რელიგიური კონტროლისთვისაა და ზღუდავს რელიგიის თავისუფლებას, აკონტროლებს რელიგიურ თავისუფლებას ქვეყნის შიგნით.
ჩინეთის ერთ-ერთი ეკლესიის წევრმა და ქრისტიანული გვერდის ადმინისტრატორმა ახლახან აღმოაჩინა ახალი კანონის შორს მიმავალი შედეგები. მას WeChat-ის მკითხველთა ჯგუფში ქრისტიანული წიგნების სიის გაზიარება სურდა, ჩამონათვალში იყო თომას კემპელის ცნობილი წიგნის სათაური „ქრისტეს იმიტაცია“. აპლიკაციამ უარყო პოსტი სიტყვა „ქრისტეს“ გამო.
სადამკვირვებლო ჯგუფმა ასევე აღნიშნა, რომ ახალი კანონის მიხედვით, ფიზიკურმა პირებმა და ორგანიზაციებმა უნდა გაიარონ სამთავრობო შემოწმება და მიიღონ „ინტერნეტში რელიგიური ინფორმაციის განთავსების ლიცენზია“, რათა შეძლონ ინტერნეტში რელიგიაზე საუბარი, თუმცა, ამ შემთხევაშიც კი, შინაარსი უნდა შეესაბამებოდეს ჩინეთის კომუნისტური პარტიის შეხედულებას რელიგიისა და მთავრობის შესახებ.
შეგახსენებთ, რომ ჩინეთი ქრისტიანობას დასავლურ რელიგიად მიიჩნევს და ამიტომ მას საფრთხედ აღიქვამს. ქვეყნის ზოგიერთ რაიონში ეკლესიები დაანგრიეს და ჯვრები ჩამოხსნეს. ცოტა ხნის წინ ასევე დააწესეს შეზღუდვა ბიბლიებისა და სხვა ქრისტიანული ლიტერატურის ონლაინგავრცელებაზე. მხოლოდ ის ჯგუფები შეძლებენ ბიბლიების დარიგებას, რომლებიც აღიარებენ ჩინეთის კომუნისტურ პარტიას და საკუთარ ქადაგებებზე ცენზურის დაწესების უფლებას მისცემენ მას.
ორგანიზაცია Open Doors-ის 2021 წლის მონაცემების მიხედვით, ჩინეთი მე-17 ადგილზეა ქრისტიანთა დევნის მხრივ მსოფლიოში.