ჩინელი ქრისტიანი დააკავეს და ათდღიანი პატიმრობა მიუსაჯეს ქუჩაში „უკანონო ქადაგებისათვის“, რადგან ქვეყნის კომუნისტური მთავრობა აძლიერებს შეზღუდვებს ქუჩის მახარებლობის მიმართ. ჩენ ვენშენს, რომელიც ქალაქ ხენიანში (ხუნანის პროვინცია) მდებარე ერთ-ერთი ეკლესიის წევრია, 3 აგვისტოს მიუსაჯეს პატიმრობა.
ქუჩაში სახარების ქადაგებისას ჩენს ხშირად დააქვს ხის ჯვარი, რომელზეც ამოკვეთილია წარწერები: „დიდება ჩვენს მხსნელს“ და „მოინანიეთ და მიიღეთ ხსნა რწმენით.“ ქადაგებისათვის ჩენს ხშირად აპატიმრებენ და მიჰყავთ პოლიციის განყოფილებაში, სადაც ის გამუდმებით შეაგონებს პოლიციის ოფიცრებს, ირწმუნონ უფალი იესო ქრისტე.
როდესაც ოფიცრებმა ჰკითხეს, შემოსავალი თუ მოაქვს იესოსადმი რწმენას, ჩენმა უპასუხა, რომ ფულის გამო არ სწამს ქრისტესი, არამედ იმის გამო, რომ მან საუკუნო სიცოცხლე მისცა.
ჩინეთში მახარებლობა აკრძალულია რეგისტრირებული რელიგიური ადგილების მიღმა. ქრისტიანთა და რელიგიურ უმცირესობათა უფლებადამცველი ორგანიზაციის International Christian Concern ინფორმაციით, ბოლო პერიოდში ქუჩაში მახარებლობა უკიდურესად გართულდა.