ოთხშაბათს, ცნობილმა ამერიკელმა მებრძოლმა (Wrestler) ჰალკ ჰოგანმა თავის „ინსტაგრამზე“ განაცხადა, რომ იგი მოინათლა. ნათლობა ფლორიდაში, Indian Rocks-ის ბაპტისტურ ეკლესიაში ჩატარდა.
„ეს არის ჩემი ცხოვრების უმნიშვნელოვანესი დღე – იესოსადმი სრული მორჩილებისა და მიძღვნის. არანაირი წუხილი, არანაირი სიძულვილი, არანაირი გასამართლება… მხოლოდ სიყვარული!“ – დაპოსტა 70 წლის ჰოგანმა „ინსტაგრამზე“, ნათლობის კადრებთან ერთად.
ჰოგანთან ერთად მოინათლა ასევე მისი მეუღლე სკაი დეილი ჰოგანი. ვიდეოკადრებში ჩანს, რომ ჰოგანი და მისი მეუღლე შემოსილნი არიან თეთრებში და იღიმიან წყალში შთაფლობისას. ჰოგანს ასევე თავზე უკეთია თავისი საფირმო თეთრი ბენდენა, ვერცხლის ჯვრის ყელსაბამთან ერთად.
„ღმერთი გასაოცარ საქმეებს იქმს ინდიან როკის ეკლესიაში“, – ვკითხულობთ ეკლესიის „ინსტაგრამგვერდზე“.
პროფესიონალ მებრძოლს თავისი ქრისტიანული რწმენის შესახებ ადრეც აქვს ნასაუბრები.