საერთაშორისო ორგანიზაცია „წამებულთა ხმა“, რომელიც დევნილ ქრისტიანთა უფლებებისთვის იბრძვის მთელ მსოფლიოში, ითხოვს ლოცვას ჩრდილოეთ კორეელი აგენტების მიერ გატაცებული ქრისტიანი ღვთისმსახურისათვის, ჯენგ მუნ სიოკისთვის. სიოკი ჩინეთიდან 2014 წლის 1-ელ ნოემბერს გაიტაცეს და 15 წლით თავისუფლების აღკვეთა მიუსაჯეს ჩრდილოეთ კორეის შრომით ბანაკში. „წამებულთა ხმა“ მისი გათავისუფლებისათვის შუამდგომლობს.
„დიაკვანი ჯენგი, რომელიც ცნობილია ასევე თავისი ჩინური სახელით – ჯანგ ვენ ში, ეთნიკურად კორეელი ჩინელია. ის 2014 წლის ნოემბერში გაიტაცეს და ჩრდილოეთ კორეის ციხეში ჩასვეს.“ – ამბობს „წამებულთა ხმის“ კორეელი წარმომადგენელი დრ. ჰაინ სუკ ფოული.
შეგახსენებთ, რომ გატაცებულ ქრისტიანს ბრალი დასდეს ჩრდილოეთ კორეის რეჟიმის გამოაშკარავებისა და სახელმწიფო ძალაუფლების დამხობისათვის ხელშეწყობის მცდელობაში; ასევე ჩრდილოეთ კორეელებისთვის სახარების ქადაგებისა და მათი დახმარებისათვის.
ორგანიზაცია „წამებულთა ხმის“ წარმომადგენელმა ტოდ ნეტლტონმა The Christian Post-ს განუცხადა, რომ იანგის დანაშაული მხოლოდ ის იყო, რომ იგი საკვებს, ტანსაცმელს, თბილ ლოგინს და ღვთის სიყვარულს სთავაზობდა მშიერ, შიშველ, შეცივებულ და სასოწარკვეთილებაში მყოფ დევნილებს.
ჯენგის გატაცებიდან 17 თვის შემდეგ, ჩრდილოეთ კორეელმა აგენტებმა ისევ გადაკვეთეს საზღვარი ხუცეს ჰენ ჩანგ-რაიოლის მოსაკლავად. ის იმ ეკლესიის ხუცესი იყო, სადაც ჯენგი მსახურობდა. „ხუცესის მკვლელებს პატივი მიაგეს ცერემონიალზე, რომელიც ტელევიზიით გადაიცემოდა,“ – ამბობს ნეტლტონი.
მისივე განცხადებით, ჩინეთის ხელისუფლებას არაფერი გაუკეთებია საკუთარი მოქალაქის გასათავისუფლებლად, სწორედ ამიტომ იგი იმედოვნებს, რომ ქრისტიანები გაერთიანდებიან და დაეხმარებიან დიაკვან ჯენგსა და მის ოჯახს.
საერთაშორისო რელიგიური თავისუფლების აშშ-ის კომისიამ დიაკვანი ჯენგი შეიყვანა “რელიგიური სინდისის პატიმართა პროექტში” (Religious Prisoners of Conscience Project). ამის შესახებ აშშ-ის სახელმწიფო დეპარტამენტის წარმომადგენელმა ინტერნეტგამოცემა Christian Post-თან განაცხადა.
საერთაშორისო ორგანიზაცია “Open Doors”-ის 2020 წლის მონაცემებით, ჩრდილოეთ კორეა პირველ ადგილს იკავებს იმ ქვეყნებს შორის, სადაც ქრისტიანები იდევნებიან. იგი ცნობილია შრომითი ბანაკებით, სადაც გატაცებული ადამიანები იმყოფებიან, მათი ზუსტი რიცხვი უცნობია.