გასულ სამშაბათს აფრიკაში, ბურკინა-ფასოს ოუდალანის პროვინციაში, მალის საზღვართან ახლოს ნათლობის დროს ჯიჰადისტებმა 15 ქრისტიანი მოკლეს. თავდასხმის ფაქტი საერთაშორისო ორგანიზაცია International Christian Concern-ის (ICC) თანახმად, რეგიონის გუბერნატორმა, სალფო კაბორმა დაადასტურა.
ამ დრომდე თავდასხმაზე პასუხისმგებლობა არავის აუღია. ექსტრემისტების მიერ გასული თვის განმავლობაში, მრავალჯერადი თავდასხმების შედეგად, 50-ზე მეტი ადამიანი დაიღუპა.
„ბურკინა-ფასოს ჩრდილოეთით მდებარე ეკლესიები დაცარიელებულია, რადგან ქრისტიანები ჯიჰადისტურ დაჯგუფებებს გაურბიან და მასობრივად ტოვებენ სოფლებს.“ – იტყობინება Premier Christian News-ი.
ბურკინა-ფასოში, განსაკუთრებით მალისთან მოსაზღვრე რაიონებში, ჯიჰადისტების მხრიდან თავდასხმები 2015 წლიდან გახშირდა, რის გამოც ქვეყანაში ასობით სკოლა დაიხურა.
ისლამისტი ექსტრემისტების ძალადობამ უფრო და უფრო იმატა ბოლო წლის განმავლობაში, რის შედეგადაც ათასობით ადამიანი გახდა იძულებული, დაეტოვებინა საკუთარი სახლი. უშუალოდ ქრისტიანებზე თავდასხმები კი 2019 წლის აპრილიდან გახშირდა, როცა ქვეყნის ჩრდილოეთით მდებარე ერთ-ერთ ქალაქში მცხოვრები ხუცესი, მისი ვაჟი და ეკლესიის ოთხი წევრი მოკლეს ისლამის მიღებაზე უარის თქმის გამო.
გთხოვთ, ილოცოთ ბურკინა-ფასოსთვის. დაე, ღმერთმა დაიცვას ჯიჰადისტებისგან დევნილი ადამიანები.