12 აპრილს კათოლიკურმა სამყარომ და პროტესტანტული ეკლესიების ნაწილმა აღდგომის ბრწყინვალე დღესასწაული იზეიმა. ტაძრები კორონავირუსის გავრცელების რისკის გამო დახურულია, შესაბამისად, ღვთის მსახურებს ონლაინრეჟიმში მოუწიათ სააღდგომო მსახურების ჩატარება.
მრევლის გარეშე ჩაატარა წირვა რომის პაპმა. მან მოუწოდა კათოლიკე მორწმუნეებს, სახლში ელოცათ და არ მისულიყვნენ ეკლესიებში ვირუსის საფრთხის გამო.
მილანის საკათედრო ტაძარში კი იტალიელმა მომღერალმა ანდრეა ბოჩელიმ პირდაპირ ეთერში კონცერტი გამართა. „მუსიკა იმედისთვის“ ‒ ასე ერქვა ბოჩელის სააღდგომო კონცერტს. კონცერტი ცარიელ ეკლესიაში ჩატარდა და პირდაპირ ეთერში გადაიცა. მისი მიზანი იყო, შეეხსენებინა იტალიის მოქალაქეებისთვის სიყვარულისა და იმედის მნიშვნელობა რთულ პერიოდში.
პროტესტანტული სამყაროს „პაპად“ წოდებულმა ფრანკლინ გრემმა სააღდგომო მსახურება ნიუ-იორკის ცენტრალურ პარკში, ცნობილ ქრისტიან მომღერალთან ‒ მაიკლ უაიტეკერ სმიტთან ერთად ჩაატარა. მსახურება „ფოქსნიუსის“ პირდაპირ ეთერში გადაიცა. მაიკლ სმიტმა რამდენიმე საგალობელი შეასრულა, ხოლო ფრანკლინ გრემმა გამამხნევებელი სიტყვით მიმართა საზოგადოებას. „ის ნამდვილად აღდგა და ცოცხალია!“ ‒ თქვა მან თავის მიმართვაში. ფრანკლინ გრემის პირდაპირი ეთერის დროს ლოცვის ცხელი ხაზი მოქმედებდა, რომელზე დარეკვა და თავისი საჭიროების გაზიარებაც ნებისმიერ მსურველს შეეძლო.
სადღესასწაულო წირვა აღევლინა თბილისის ღვთისმშობლის ზეცად აყვანების კათოლიკურ ტაძარშიც, რომელსაც მრევლი არ დასწრებია. მორწმუნეები მას თვალს საზოგადოებრივი მაუწყებლის პირდაპირ ეთერში ადევნებდნენ.
კომენდანტის საათის გამო, წირვა ჩვეულებრივზე რამდენიმე საათით ადრე ჩატარდა. ტრადიციულად კი, სააღდგომო ლიტურგია კათოლიკურ ტაძრებში 23:30-დან იწყება.
სააღდგომო წირვა აღავლინა ბათუმის წმიდა სამების პროტესტანტულმა ეკლესიამაც. წირვას ეკლესიის წევრები არ ესწრებოდნენ, ისინი სააღდგომო მსახურებას ეკლესიის ფეისბუკგვერდზე ადევნებდნენ თვალს, სადაც პირდაპირ ეთერში გადაიცემოდა სააღდგომო ლიტურგია.
შეგახსენებთ, რომ საქართველოში საგანგებო მდგომარეობის გამო, ევანგელური ეკლესიები ღვთისმსახურებებს ერთ თვეზე მეტია, შეცვლილი ფორმატით ატარებენ. ეკლესიებში ძირითადად სასულიერო პირები იკრიბებიან, მრევლი კი მსახურებას სოციალური ქსელის დახმარებით ონლაინში ადევნებს თვალს.
პროტესტანტული ეკლესიების დიდი ნაწილი აღდგომას 19 აპრილს იზეიმებს.