25 დეკემბერს მთელ მსოფლიოში, ქრისტიანთა დიდი ნაწილი მაცხოვრის შობას იზეიმებს. შობას აღნიშნავენ როგორც კათოლიკე მორწმუნეები, ასევე პროტესტანტები და მსოფლიოს მართლმადიდებლური ეკლესიების უმრავლესობა.
წელს შობას განსხვავებულად ხვდება იერუსალიმი. წმინდა ქალაქში მომლოცველთათვის დახურული იქნება მაცხოვრის შობის ტაძარი, „ომიკრონის“ შტამის გავრცელების გამო; თუმცა პანდემიის მიუხედავად, შობის დღესასწაულის მოახლოება იმედით და სიხარულით ავსებს გარემოს.
რომის პაპი დღეს 22:20 საათზე საშობაო მესას აღავლენს წმინდა პეტრეს ტაძარში და მთელი მსოფლიოს ქრისტიანებს სიტყვით მიმართავს.
დღესვე, ამერიკული ტელეარხის – „ფოქსნიუსის“ – ეთერიდან „პროტესტანტების პაპად“ წოდებულმა მქადაგებელმა ფრანკლინ გრემმა ქრისტიანებს დამდეგი შობა მიულოცა და განაცხადა, რომ მისი საშობაო გზავნილი თითოეული ადამიანისთვის სიყვარულია, რადგან ბიბლია მაცხოვრის შობის შესახებ ამბობს: „ისე შეიყვარა ღმერთმა ქვეყანა, რომ მისცა თავისი მხოლოდშობილი ძე, რათა ყოველი, ვინც მას ირწმუნებს, არ დაიღუპოს, არამედ ჰქონდეს საუკუნო სიცოცხლე“ (იოანეს 3:16).
„მინდა, ყველა ადამიანმა იცოდეს, რომ უფალს უყვარს, და ამიტომაც მოევლინა ქრისტე დედამიწას!“ – ამბობს ფრანკლინ გრემი.
აღსანიშნავია, რომ მსოფლიოს მართლმადიდებლური ეკლესიების უმრავლესობაც შობას ახალი სტილით, 25 დეკემბერს აღნიშნავს. როგორც ცნობილია, 16 ავტოკეფალიური ეკლესიიდან 10, უძრავ საეკლესიო დღესასწაულებს ახალი კალენდარული სტილით ზეიმობს, ხოლო მოძრავს – ძველი კალენდარული სტილით. ეს ეკლესიებია: კონსტანტინოპოლის, ალექსანდრიის, ანტიოქიის, საბერძნეთის, კვიპროსის, რუმინეთის, ბულგარეთის, ალბანეთის, ჩეხეთ-სლოვაკეთისა და ამერიკის ეკლესიები.
საქართველოში 25 დეკემბერს შობას იზეიმებენ კათოლიკური ეკლესია და პროტესტანტული ეკლესიები. ტრადიციისამებრ, ეკლესიათა უმრავლესობაში შობას ღამის თევით და სადღესასწაულო წირვის აღვლენით შეხვდებიან.