ორგანიზაცია Open Doors-მა თავის ანგარიშში 2020 წელს მსოფლიოში ქრისტიანთა დევნის ორი მნიშვნელოვანი ტენდენცია გამოავლინა. პირველი, გასულ წელს დახოცილ ქრისტიანთა რაოდენობა 60%-ით გაიზარდა, ძირითადად, ნიგერიელი ქრისტიანების მიმართ ძალადობის გამო. მეორე მიზეზი კი ის არის, რომ ანტიქრისტიანული მთავრობები მთელ მსოფლიოში იყენებენ კოვიდ-19-ის შეზღუდვებს ქრისტიანთა დევნისთვის.
„2020 წელი გაურკვევლობისა და შიშის წელი იყო. ჩვენ ყველანი ვებრძოდით ვირუსს, რომელსაც ვერ ვხედავდით შეუიარაღებელი თვალით. ასეთივე ვირუსული იყო ქრისტიანების მიმართ დისკრიმინაცია, იზოლაცია და ძალადობა კოვიდ-19-ის ბერკეტად გამოყენებით.“ – განაცხადა Open Doors-ის პრეზიდენტმა.
ნიგერიაში რადიკალმა ისლამისტებმა მოკლეს 2,200-ზე მეტი ქრისტიანი. Open Doors-ის სტატისტიკის თანახმად, ეს რიცხვი მიუთითებს იმაზე, რომ დახოცილ ქრისტიანთა დაახლოებით ნახევარი ნიგერიაზე მოდის. აღსანიშნავია ისიც, რომ 2020 წელს გარდაცვლილ ქრისტიანთა უმეტესობა ექსტრემისტულ ჯგუფებს შეეწირა.
ნიგერიაში ისლამისტების მიერ ქრისტიანებზე ზეწოლას გენოციდს უწოდებს Open Doors-ის პრეზიდენტი. ქრისტიანთა დევნა მეზობელმა ქვეყნებმაც დაიწყეს. აფრიკის ქრისტიანულ ქვეყნებშიც კი იდევნებიან ქრისტიანები, მაგალითად, მოზამბიკსა და ბურკინა ფასოში.
ქრისტიანთა დევნის სხვა ცხელი წერტილები ასევე გახლავთ ჩინეთი და ინდოეთი. ჩინეთში კომუნისტური პარტია აკონტროლებს ქრისტიანებს სათვალთვალო ტექნოლოგიის გამოყენებით, რაც საშუალებას აძლევს ქვეყანას, თვალყური ადევნოს თავის მოსახლეობას და დასაჯოს ხალხი ეკლესიაში სიარულის გამო.
რაც შეეხება კოვიდ-19-ის გავლენას ქრისტიანების მდგომარეობაზე, ბევრ ქვეყანაში ქრისტიანებმა დაკარგეს სამსახური პანდემიის გამო. ბევრი მთავრობა კი უარს ამბობს მორწმუნეთათვის დახმარების გაწევაზე, დამსაქმებლებიც უკან არ იღებენ ქრისტიან თანამშრომლებს, ხშირად სასწრაფო დახმარებაც კი მიუწვდომელია მათთვის. შესაბამისად, კოვიდ-19-მა მეტი ტანჯვა მოუტანა ქრისტიანებს.
Open Doors-ის მოხსენებაში 50 ქვეყანაა აღრიცხული, სადაც ქრისტიანთა დევნის დონე ძალიან მაღალია. როგორც ორგანიზაცია აცხადებს, ეს ტენდენცია, მეტად სავარაუდოდ, გაგრძელდება, რადგან დღევანდელ მსოფლიოში არსებობენ მთავრობები, რომელთაც აქვთ შესაძლებლობა, უთვალთვალონ ცალკეულ პიროვნებებს. ქრისტიანები კი მსოფლიოში ყველაზე მეტად იდევნებიან, რადგან ისინი ბევრ ქვეყანაში რელიგიურ უმცირესობას წარმოადგენენ.
„გვინდა, ვუთხრათ ყველას, რომ ნებისმიერ ადამიანს უნდა ჰქონდეს უფლება, აირჩიოს საკუთარი რწმენა. ეს ეხება სინდისის თავისუფლებას.“ – განაცხადა Open Doors-ის პრეზიდენტმა.