„იერუსალიმი ჩვენი ქალაქია.“ – განაცხადა სამშაბათს, ანკარაში თურქ კანონმდებლებთან შეხვედრისას, თურქეთის პრეზიდენტმა რეჯეპ ტაიპ ერდოღანმა. ამის შესახებ ინტერნეტგამოცემა The Times of Israel-ი წერს.
„ეს ქალაქი ცრემლით დავტოვეთ პირველი მსოფლიო ომის დროს, თუმცა იქ დღესაც შესაძლებელია ოტომანთა კვალის პოვნა. იერუსალიმი ჩვენი ქალაქია. ჩვენი პირველი ქიბლა (მიმართულება ლოცვის დროს მუსლიმანთათვის წმინდა ადგილისკენ) ალ-აქსა და კლდის გუმბათი ჩვენი რწმენის სიმბოლური მეჩეთებია. გარდა ამისა, ამ ქალაქში იუდაიზმისა და ქრისტიანობის წმინდა ადგილებიც არის.“ – თქვა თურქეთის პრეზიდენტმა.
გასულ შაბათს, სიტყვით გამოსვლისას კი ერდოღანმა დაგმო ისრაელის მიერ „პალესტინელთა ჩაგვრა“.
„იერუსალიმის საკითხი მხოლოდ გეოპოლიტიკური პრობლემა როდია ჩვენთვის. ჩვენი წინაპრები პატივისცემას იჩენდნენ საუკუნეების განმავლობაში იმით, რომ ამ ქალაქს კარგ მდგომარეობას უნარჩუნებდნენ. იერუსალიმი ჩვენი ქალაქია. ჩვენი ქვეყნისა და ერისათვის დიდი პატივია, ყველგან განვაცხადოთ ჩაგრულ პალესტინელთა უფლებების შესახებ, რომლებთან ერთადაც საუკუნეების განმავლობაში ვცხოვრობდით. აქედან გამომდინარე, ჩვენ ბოლომდე მივყვებით როგორც პალესტინის საკითხს, რომელიც მსოფლიო სინდისის სისხლმდინარე ჭრილობაა, ისე – იერუსალიმისას.“ – ნათქვამია თურქეთის პრეზიდენტის „ტვიტერის“ ოფიციალურ გვერდზე.
ჯერჯერობით, ისრაელის საგარეო საქმეთა მინისტრს არაფერი განუცხადებია თურქეთის პრეზიდენტის საპასუხოდ.
შეგახსენებთ, რომ 2020 წლის ივლისში, სტამბულში, აია-სოფიას მეჩეთად გამოცხადების შემდეგ ცოტა ხანში, ერდოღანმა მზერა იერუსალიმს მიაპყრო და სოციალურ ქსელში დაწერა: „აია-სოფიას აღორძინება ნიშანია ალ-აქსას მეჩეთისათვის თავისუფლების დაბრუნებისა.“